Куыстытæ активонæй цæуынц æрæфы районы 2 скъолайы æмæ сывæллæтты иу рæвдауæндоны
Республикæйы дарддæр ног кæнынц ахуыргæнæндæттæ. Куыстытæ активонæй цæуынц æрæфы районы 2 скъолайы æмæ сывæллæтты иу рæвдауæндоны. Ног сæрмагонд кълæстæ байгом кæндзысты Сечеры æмæ Толдзгуыны. Ныртæккæ агъуыстыты æххæст кæнынц аивгæнæн куыстытæ. Бæлвырддæр радзурдзæн Хъайтмазты Дзерассæ.
Ацы кабинеттæ нырма арæзтадон фæзы хуызæн сты. Фæлæ ахуыры азы райдианмæ суыдзысты нырыккон ахуырадон тыгъдадтæ. Сечеры скъолайы байгом кæндзысты арæзтадон кълас, Толдзгуыны та – туристон. Уым ахуыр кæндзысты туризмы, бæстæзонынады бындуртæ, цæттæ кæндзысты балцытæм. Зонындзинæдтæ исын дзы сæ бон уыдзæн районы иннæ хъæутæй скъоладзаутæн дæр.
Дыууæ скъолайы дæр ныридæгæн æххæстæй баивтой инженерон коммуникацитæ, хъармгæнæн, электрон тыхы æмæ доны системæтæ. Дарддæр аив кæнынц агъуыстытæ. æрвылбон объектты кусы 6 арæзтадон бригады онг. Сæрмагонд æргом здахынц æдасдзинадмæ: сæвæрдтой зынгсирвæзтыты нырыккон сигнализаци, къæлидорты та чи нæ быры, ахæм плиткæ. æппæт куыстытæ цæуынц фæткмæ гæсгæ, алы проектон уынаффæйыл та ныхас цæуы скъолайы администрациимæ. Бындурон цалцæг фæнд кæнынц ног ахуыры азы райдианмæ фæуын.
Фыццаг хатт бæстон цалцæг цæуы районы сывæллæтты рæвдауæндæттæй иуы дæр. Бæстыхайыл цæуы 45 азæй фылдæр. Уыцы рæстæгмæ дзы бындурон цалцæг никуы уыд. Ныридæгæн баивтой объекты сæр, рудзгуытæ, инженерон хызтæ æмæ хъармгæнæн системæ. Фæвæййынц мидаивгæнæн куыстытæ. Уый фæстæ рæвдауæндон сифтонг кæндзысты ног технологон кусæнгæрзтæй.
Цалцæджы фæстæ хъомылгæнинæгтæ æрбацæудзысты райдзаст агъуыстытæм, нырыккон кусæнгæрзтимæ æмæ аивгонд территориимæ.Ууыл куыст нæ фæуыдзæн. Программæ «Ахуырады райрæзт»-мæ гæсгæ ма хæстæгдæр рæстæг фæнд кæнынц бындурон цалцæг ноджыдæр районы 2 рæвдауæндоны сæххæст кæнын.
Тагъд арæзтадон инструментты уынæр раивдзæн сывæллæтты худт. Цалцæггонд скъолатæ æмæ рæвдауæндæттæ байгом кæндзысты ног гæнæнтæ æрæфы районы æвзонг цæрджыты ахуырадæн, сфæлдыстадæн æмæ райрæзтæн.
