Ацы хатт не сфæлдыстадон къорд бæрнон кусджытимæ иумæ абалц кодта Рахизфарсы районы хъæутæм
Республикæйы районтæ дæр къæпхæнгай рæзынц, æмæ дзы цæуынц хуыздæрырдæм ивддзинæдтæ. Нысанмæ арæзт программæтæ æххæст кæнгæйæ, арæзт æмæ рацарæзт цæуынц, социалон æгъдауæй ахсджиаг объекттæ. Сæйрагдæр нысан у – инфраструктурæ фæхуыздæр кæнын æмæ Цæгат Ирыстонмæ фылдæр туристты ргом раздахын. Уымæй дарддæр республикæйы цæрджыты куысты бынæттæй ифтонг кæнын. Ацы хатт не сфæлдыстадон къорд бæрнон кусджытимæ иумæ абалц кодта Рахизфарсы районы хъæутæм.
Районы сæргълæууæг Фрайты Сослан радзырдта, гыццыл лæппу ма куы уыди, уæд-иу йе мкъласонтимæ сæ уарзон 6-æм скъола куыд æфснайдтой, уый. Уæдæй рацыд 45 азы, æмæ йæ бахъуыд бындуронæй сцалцæг кæнын. Егъау куыстытæ райдадйдзысты уалдзæджы. Хæстæгдæр 3-4 азы та нысан кæнынц æппæт скъолатæ дæр сцалцæг кæнын. Сметæтæ сты цæттæ. Уымæй дарддæр ныртæккæ Беслæны арæзт цæуы ноджыдæр иу скъола. Уыдзæн дзы 550 бынаты. Фæз ныридæгæн у цæттæ. Афæдзы кæрон та байгом кæндзысты æвзонг техникты æмæ натуралистты станцæтæ. Дыууæ центры ахуыр кæндзысты фæйнæ 135 адæймаджы. Беслæны фыццæгæм скъолайы спортивон залы фарсмæ та арæзт цæуы терроризмы профилактикæйы æппæтадæмон культурон-патриотон центр. Стыр æргом здахынц фæндæгты уавæрмæ дæр. Зæронд Бæтæхъойы хъæуы скъолайы цалцæггæнæн куыстытæ цæудзысты фыццаг хатт. Фæзындзæн ма сæм сывæллæтты рæвдауæндон æмæ культурæйы хæдзар. Се ргом аздахдзысты хъæууон хæдзарады рæзтмæ дæр.
