Ныхас цыд федералон закъонæвæрынады домæнтыл, товарты маркировкæйы фарстаты фæдыл
Республикæйы Сæргълæууæг Сергей Меняйлойы разамындæй арæзт æрцыд, промышленнон продукцийы æнæзакъон зилдухы ныхмæ мадзæлттыл æмбырд. Ныхас цыд федералон закъонæвæрынады домæнтыл, товарты маркировкæйы фарстаты фæдыл. Цæгат Ирыстоны экономикон рæзты министры хæдивæг Туаты Георгий куыд радзырдта, афтæмæй ацы аз уалдзæджы Уæрæсейы райдыдтой бæгæныйæн, стæй лæмæгъ нозтытæн къæпхæнгай маркировкæ кæнын. 1-æм октябрæй фæстæмæ маркировкæ кæнын райдайдзысты авгæй конд æмæ полимерон упаковкæйы продукцийæн. 2024-æм азы 15-æм январы та маркировкæ æвæрдзысты алюминæй конд æвгтæн. Профилон министры хæдивæг ма загъта, къæпхæнгай куысты фарс кæй рахæцыдысты егъау æмæ чысыл бæгæныфыцæн куыстуæттæ. Уыимæ ныртæккæ бирæ базарадон организацитæ продукци маркировкæ кæнынмæ цæттæ не сты. Уымæн æмæ чысыл дуканиты нæй бæлвырд кусæнгæрзтæ æмæ программон ифтонгдзинад. Экономикон рæзты министрад амалхъом адæмимæ кæны æмьарынгæнæн куыст. Уымæй дарддæр фæлхасадмæ цæстдарды цæгатирыстойнаг управленийы рдыгæй бæстон цæстдард цæуы товарты зилдухмæ. Æмбырды ма æрдзырдтой хойрæгты продукцийы æнæзакъон зилдухыл. Сергей Меняйло бафиппайдта, ацы хъуыддагмæ хъæуы лæмбынæг æмæ бæрнон цæстæй кæсын.
