Ныртæккæ дзы райдыдтой регионты *хсæн 3-аг æмбырдтæ
Сæрд — скъоладзауты фæлладуадзыны рæстæг, фæлæ ног зонындзинæдтæ исынмæ чи тырны, уыцы сывæллæттæн фадат ис ахуырады центр «Вершинæ»-мæ цæуын. Ныртæккæ дзы райдыдтой регионты *хсæн 3-аг æмбырдтæ. Цæгат Ирыстонмæ æрбацыдысты архайджытæ Уæрæсейы алы рæттæй. Фидæны олимпиадæтæм «Вершинæ»-йы скъоладзауты цæттæ кæны Мæскуыйы паддзахадон университеты доцент. Каникулты рæстæг ахуырады центры кæрæдзийы ивдзысты 10 фæлтæрæй фылдæр. Бæстондæр хабæрттæ радзурдзæн Чехойты Фатимæ.
Скъоладзаутæн сæ фылдæрæн сæрд — фæллад уадзыны рæстæг. Руслан Омаровæн та — йæ бæллицмæ фæхæстæгдæр уæвыны фадат. Суворовон æфсæддон училищæйы ахуыргæнинаг, æппæтуæрæсеон олимпиадæйы регионалон къæпхæны призер сфæнд кодта каникултæ ахуырадон центр «Вершинæ»-йы арвитын. Ам цæуынц сæрдыгон профилон фæлтæртæ физикæйæ. Русланы ныхæстæм гæсгæ, бæлвырд зонæдтæ йын рагæй цымыдисаг сты. Фæнды йæ æфсæддон тæхæг суæвын, уымæн та хъæуынц арф зонындзинæдтæ физикæ æмæ математикæйæ.
Фидæны олимпиадæмæ цæттæ кæнынц æрыгон историктæ дæр. Партæты раз — 40 скъоладзауы бæстæйы алы рæттæй. Ацы аз æмбырдты географи фæуæрæхдæр: Якути, Хабаровскы край, Мæскуыйы облæст… Скъоладзаутæ ам, æппæтуæрæсеон олимпиадæмæ цæттæгæнгæйæ, райсынц арф зонындзинæдтæ. Ахуыр сæ кæны Мæскуыйы паддзахадон университеты историон факультеты доцент, скъолодзауты æппæтуæрæсеон олимпиадæйы предметон-методикон къамисы бæрнон секретарь Анна Талызина.
Фыццаг фæлтæртæ ныр райдыдтой. Архайджытæн бацæттæ кодтой алывæрсыг программæ: лекцитæ, практикон ахуыртæ, олимпиадæйы хæслæвæрдтæ æмæ фæлварæн тестытæ, стæй зындгонд ахуыргæнджытимæ куыст. Скъоладзаутæн фадат ис профилон педагогтимæ æмæ фидæны дæсныйадимæ хæстæгдæр базонгæ уæвынæн, стæй равзæрст къабазы æнтыстдзинæдтæ йæ къухы кæмæн бафтыдис, уыдонмæ фарстытæ раттынæн.
«Вершинæ» кусы 2022-æм азæй, ахъаз у сывæллæтты æмæ фæсивæды курдиæтты рæзтæн. Сæрдыгон ахуырадон фæлтæртæ ам саразынц 3 азы фæд фæдыл. Аххæссынц скъолайы æппæт дисциплинæтыл — бæлвырд æмæ гуманитарон зонæдтæй спорт æмæ аивады онг. Ацы сæрд центры куыст цæудзæн 13 ахуырадон программæмæ гæсгæ. Архайдзысты дзы 350 скъоладзауы æппæт республикæйæ.
