Мадзал арæзт æрцыди, Цæгат Ирыстон æмæ мæскуыйаг уæлдæр ахуыргæнæндоны хсæн республикæйы сæргълæууæджы хъæппæрисæй цы æмгуыстады бадзырд фыст æрцыди, уый фæлгæты
Сергей Меняйло архайдта Мæскуыйы æппæтадæмон ахастдзинæдты паддзахадон институты сæрдыгон скъола байгом кæныны хъуыддаджы. Мадзал арæзт æрцыди, Цæгат Ирыстон æмæ мæскуыйаг уæлдæр ахуыргæнæндоны хсæн республикæйы сæргълæууæджы хъæппæрисæй цы æмгуыстады бадзырд фыст æрцыди, уый фæлгæты. Проекты архайджытæ систы мæскуыйаг институты 20 студенты, стæй 30 студенты та хæххон аграрон æмæ Цæгат Кавказы хæххон металлургон институттæй. Темæ – «Уæрæсейы регионты туристон æмæ инвестицион хъомыс хуыздæр кæнын». Программæйы ис лекцитæ, дæсныйадæвдисæг ахуыртæ æмæ семинартæ. Уымæй уæлдай, мæскуыйаг институты профессортимæ фембæлдтытæ. Сæрдыгон скъола байгом кæныны мадзалы архайдтой институты ректоры хæдивæг Станислав СУровцев, нæ республикæйы хицауады сæрдары хæдивæг Тугъанаты Ларисæ, парламенты сæрдар Тускъаты Таймураз, ахуырад æмæ наукæйы министр Алыбекты Эллæ, æмæ Цæгат Ирыстоны уæлдæр ахуыргæнæндæтты ректортæ. Сергей Меняйло куыд фæнысан кодта, афтæмæй æмгуыстады бадзырд фадат ратдзæни цæгатирыстойнаг институтты статус фæуæлдæр кæнынæн, стæй хорзырдæм фæахъаз уыдзæни ахуырадыл иумæйагæй.
