Цæгат Ирыстоны разамонæг сын ракодта тæфæрфæс, æмæ загъта, сæ хæстæджытæ тохы быдыры сæхи хъæбатырæй кæй равдыстой, уый
Ивгъуыд къуырийы кæрон республикæйы Сæргълæууæг Сергей Меняйло фембæлд, сæрмагонд æфсæддон операцийы зонæйы йе фсæддон хæс æххæстгæнгæйæ чи фæмарди, уыцы хæстонты бинонтимæ. Цæгат Ирыстоны разамонæг сын ракодта тæфæрфæс, æмæ загъта, сæ хæстæджытæ тохы быдыры сæхи хъæбатырæй кæй равдыстой, уый. Æфсæддонтæ сæ амæлæты фæстæ хорзæхгонд æрцыдысты лæгдзинады ордентæй. Ахæм кады аккаг систы, се фсæддон хæс æххæстгæнгæйæ сæхи ныфсхаст æмæ хъайтарæй кæй равдыстой, уый тыххæй. Сергей Меняйло фидарæй загъта, сæ бинонтæн сын республикæ алывæрсыг æххуыс кæй кæндзæни, уый. Хæрзиуджытæ дæттыны мадзалы архайдтой Цæгат Ирыстоны фæллойы æмæ социалон рæзты министр Айдарты Алинæ, республикæйы æфсæддон коммисары хæдивæг Джиоты Алыксандр, сæрмагонд æфсæддон операцийы архайджытæн æххуыс кæныны паддзахадон фонд «Фыдыбæстæ хъахъхъæнджыты» республикон филиалы директор Хетæгкаты Маринæ.
