Республикæйы разамонæг сын тæфæрфæс ракодта, æмæ загъта, сæ хæстæджытæ сæхи ныфсхаст æмæ хъæбатырæй кæй равдыстой, уый
Цæгат Ирыстоны Сæргълæууæг Сергей Меняйло лæгдзинады ордентæ радта, сæрмагонд æфсæддон операцийы рæстæг чи фæмарди, уыцы бархионты батальон «Алани»-йы службæгæнджыты бинонтæн. Республикæйы разамонæг сын тæфæрфæс ракодта, æмæ загъта, сæ хæстæджытæ сæхи ныфсхаст æмæ хъæбатырæй кæй равдыстой, уый. Куыд фæнысан кодта, афтæмæй ацы фæсивæд фыдыбæстæ бахъахъхъæнын сæ хæсыл банымадтой, æмæ сын уый тыххæй бузныг. Фыдыбæстæйæн зын сахат йæ сæрвæлтау æрбалæууыны хъуыды сæм æрцыди. Уæ фырттæ, бинойнæгтæ, фыдтæ æмæ æфсымæртæ стыр кадимæ сæххæст кодтой се фсæддон хæс. Сæ цард радтой паддзахады хæдбардзинадыл тох кæнгæйæ. Мах нæхи рдыгæй алцыдæр кæндзыстæм, цæмæй сæ ном рохгонд ма уа, загъта Сæргълæууæг. Сергей Меняйло фæллойы æмæ социалон рæзты министр Айдарты Алинæйæн бахæс кодта, не мзæххон хъæбатырты бинонтæн алывæрсыг æххуыс кæнын. УФ-йы президенты указмæ гæсгæ лæгдзинады ордентæй сæ амæлæты фæстæ хорзæхгонд æрцыдысты Багаты Ацæмæз, Хъарадзауты Георгий æмæ Цхуырбаты Ролланд.
