Уыимæ дисы фтауы куыд профессионалты, афтæ аивадуарзджыты дæр
Сергей Образцовы номыл куклаты æппæтадæмон скъола дарддæр йæ куыст кæны Дзæуджыхъæуы. Уыимæ дисы фтауы куыд профессионалты, афтæ аивадуарзджыты дæр. Преми «Сызгъæрин маскæ»-йы бирæ хæттыты лауреат Виктор Антонов бацæттæ кодта цымыдисаг спектакль «Цирк на нитях». Сæвæрдта йæ театр «Саби»-йы сценæйы. Дæсныйадæвдисæг ахуырты чи архайы, уыдонæн ахæм мадзæлттæ сты тынг ахадгæ. Чи зоны æмæ чысыл театрдзаутæм дæр фæзындзæн, сæ фидæн ацы дæсныйадимæ сбæттыны бæллиц. Бæстондæр радзурдзæн Хъайтмазты Дзерассæ.
Рагон уарзон романстæ зары хъæлдзæг клоун. Спектакль йæ райдианæй аивадуарзджыты балцы акодта ивгъуыдмæ. Сывæллæтты театр «Саби»-йы сценæйы баиу сты цирчы æмæ куклаты равдыст. Театралон сценæйæ рауад армукъайы фæз, куклатæй та – уынджы цирчы æцæг артисттæ. Ам факир аныхъуыры шпагæ, фокустæгæнæг та æвдисы алыхуызон диссæгтæ. Залы адæм цымыдисæй кæсынц, уæлдæфон гимнаст æнæуæзæй куыд тæхы, уымæ æмæ цин кæнынц маймули-акробаттыл. Алы номырыл дæр æмбæлынц къухæмдзæгъдимæ æмæ æнхъæлмæ кæсынц радон трюкмæ.
Марионеткæтæ Виктор Антоновы къухты судæгас вæййынц. Преми «Сыгъзæрин маскæ»-йы бирæ хæттыты лауреат у спектакль «Цирк на нитях»-ы автор æмæ æххæстгæнæг, стæй ма ацы куклатæ саразæг дæр. Сценæйы æппæт трюктæ æххæстгонд цæуынц механикон хуызы, æппæт процесс та амоны иу адæймаг. Жанр ног нæу, фæлæ цыма рохуаты аззад, æмæ уымæ гæсгæ спектакль уæлдай цымыдисаг уыд.
Ацы хъуыды нывгæнæгмæ сæвзæрд 30 азæй фылдæры размæ. Уæдæй фæстæмæ ацы шоу æвдыст æрцыд бирæ бæстæты. æмæ йæ ныр федтой ирон аивадуарзджытæ дæр. Сергей Образцовы номыл зындгонд театр спектакль «Саби»-йы сценæмæ рахаста кукольникты дыккаг æппæтадæмон скъолайы программæ æххæстгæнгæйæ .
Æвзонг аивадуарзджытæй фæстæмæ ма залы уыдысты æппæтадæмон скъолайы ахуыргæнинæгтæ дæр. Уыдонæн ацы равдыст уыд дæсныйадæвдисæг ахуыры хуызæн. æмбарынц, ахæм рогдзинад кæй у, куклаты театры рагæй чи архайы, æмæ ацы актерты сурæттæ йæхæдæг чи аразы, уыдоны уæззау фæллойы хатдзæг.
Спектаклы фæстæ Виктор Антонов сарæзта дæсныйадæвдисæг ахуыр куклаты скъолайы ахуыргæнингæтæн. Ацы аз проекты архайы 40 адæймагæй фылдæр. Се *хсæн – театр «Саби»-йы 5 кусæджы.
Æппæтадæмон скъолайы куысты рæстæг цы спектакльтæ сæвæрой, уыдон бацæудзысты «Саби»-йы репертуармæ æмæ сæ сценæмæ рахæсдзысты ног сезоны. Уый та нысан кæны, Цæгат Ирыстоны æвзонг аивадуарзджытæм кæй æнхъæлмæ кæсы цымыдисаг равдыстытæ.
