650 уæлахиздзауы æппæт бæстæйæ райстой фæйнæ милуан сомы
Хъæлæсон æххуысгæнæг, микроэлементтимæ нозт æмæ суанг тамакойæ косметикæ дæр. Ахæмтæ сты, цæгатрыстойнаг æрыгон амалхъом адæмы проекттæ. 2 дзы систы хуыздæртæ федералон конкурс «Студентон стартап»-ы. Бæлвырддæр хабæрттæ радзурдзæн Хъайтмазты Дзерассæ.
Конференцимæ баиу кæнын, къæлиндары снысан кæнын цау, байгом кæнын папкæ кæнæ документ. Чырæ бастдзинады уæлæмхасæн офисон программæтимæ куысты хъæлæсон ассистентыл бацархайдта Цæгат Ирыстоны паддзахадон университеты студент Гæззаты Алан-Бæрсæг. Пайда кæнын дзы ис, телефоны сæйраг куыстæй ма иппæрдгæнгæйæ. Ассистент иртасы цæсгæмттæ. Йæ бындуры ис сæрмагонд нейронон системæ. Проект сси федералон конкурс «Студентон стартап»-ы уæлахиздзау æмæ рамбылдта 1 милуан сомы дарддæры райрæзтæн.
Хæрзад æмæ пайдайаг. Аграрон университеты бындурыл биотехнологийы æмæ стандартизацийы факультеты студенттæ бакуыстой хи туаг æхсыры продуктыл. Хъæздыг у витаминтæй æмæ микроэлементтæй. Ныридæгæн ис дуканиты. Пробиотик пайда у ахсæнæн, зæгъы Тахохты Виталий. Фæнды йæ фæпарахатдæр кæнын йæ архайд. Уымæн ын æххуыс уыдзæн грант.
Плиты Айседорæйыл цæуы 20 азы, фæлæ йын ныридæгæн ис косметикæйы хи лини. Конкурсы æмæ грантон æххуысы тыххæй куы базыдта, уæд сфæнд кодта хи стартапыл бакусын. Балæвæрдта курдиат иннæ рады архайынмæ. Куыд зæгъы, афтæмæй проект у цымыдисаг. Студенттæ аграрон университеты фазендæйы зайын кæнынц тамако. Ис дзы хорз уавæртæ, уымæ гæсгæ тыллæг рауад хъæздыг.
Ацы зайæгойæ цы протеинтæ райсынц, уыдонæй пайда кæнынц медицинæйы. Раст бакусгæйæ та дзы райсынц никотинон туагад. Зынгонд куыд у, афтæмæй пайда у дзыккутæн. Плиты Айседорæйы ныхæстæм гæсгæ, стартапы грантон æххуыс ратдзæн, импортон продукт ивыны (импортозамещение) фарстайы иу хай алыг кæныны фадат.
«Студентон стартап» у регионты фæсивæдæн сæ амалхъом потенциал сæххæст кæныны гæнæн.
650 уæлахиздзауы æппæт бæстæйæ райстой фæйнæ милуан сомы. Æртæ стартапы Цæгат Ирыстонæй. Курдиæттæ дæттыны дыккаг этап ныридæгæн райдыдта. Ахæсдзæн 15 июльмæ.
