Сæ проекттæ йæм бацæттæ кодтой æвзонг физиктæ, биологтæ, химиктæ æмæ айтишниктæ
Райдай хъæппæрисæй, æмæ йæ царды рауадзыны онг фæуы. Сывæллæтты рæзты центр «Альтаир» йæ дуæрттæ байгом кодта хъæппæристы æмæ технологиты фестивалæн. Сæ проекттæ йæм бацæттæ кодтой æвзонг физиктæ, биологтæ, химиктæ æмæ айтишниктæ. Се ппæт дæр сты Рахизфарсы районы рæзты центртæ «Точка роста»-йы хъомылгæнинæгтæ. Фестивалы сæйраг нысан у – курдиатджын фæсивæды куысты хатдзæгтæ равдисын. Бæлвырддæр хабæрттæ радзурдзæн Фидараты Маринæ.
Хъæппæристы æмæ технологиты фестиваль арæзт æрцыд сывæллæтты рæзты центр «Альтаир»-ы. Сæ проекттæ йæм бацæттæ кодтой Рахизфарсы районы «Точка роста»-йы хъомылгæнинæгтæ.
Фестиваль арæзт æрцыд Рахизфарсы районы ахуырады управленийы хъæппæрисæй. Точка ростайы центртæй йæм скъоладзаутæ æрбацыдысты сæ наукон-иртасæн куыстытимæ физикæйæ, биологийæ, химийæ, информатикæйæ æмæ æндæр къабæзтæй.
Национ проект «Ахуырад» æххæст кæнгæйæ, Рахизфарсы районы 17 иумæйаг ахуыргæнæдоны кусынц центртæ «Точка роста». Уыдон та сты уæлæмхасæн ахуырады 35 педагогы. «Альтаир» – у методикон центр районы скъолатæн. Фестиваль сын фадат дæтты кæрæдзийы фæлтæрддзинадимæ, актуалон хъæппæристимæ æмæ хи методикæтимæ базонгæ уæвынæн.
Афтæ, зæгъæм, Людмила Борзенко сывæллæтимæ архайы 3Д модельтæ аразыны. Фæлæ 3д принтеры бæсты пайда кæнынц гæххæттæй æмæ æгæрон фантазийæ. Сæ къухтæй конд чингуыты фенæн ис рæсугъд галуантæ æмæ æнæхъæн горæттæ.
Сывæллæтты рæзты центр «Альтаир» йæ куыст райдыдта ивгъуыд аз сентябры. Инновацион фæз суазæг кодта 1200 ахуырдзауы. Æвзонг биологтæ, айтишниктæ æмæ техниктæ пайда кæнынц нырыккон кусæнгæрзтæй. Афтæмæй хуыздæр зонгæ кæнынц наукæимæ.
Скъоладзауты проекттæ дзурæг сты уæлæмхасæн ахуырады центрты куысты хатдзæгтыл. Уыдон та аразгæ сты сывæллæтты æмæ педагогты бæстон архайдæй. Ахуыргæнджытæ сæ зæрдæ дарынц, хъæппæристы æмæ технологиты фестиваль традицион кæй суыдзæн, ууыл.
