Æвзонг нывгæнджытæ нырма ахуыр кæнынц æндæр бæстыхайы
Тагъд рæстæджы Тауаситы Сосланбеджы номыл сывæллæтты аивадон скъола бындурон цалцæджы фæстæ йæ дуæрттæ байгом кæндзæн йæ ахуырдзаутæн. Æвзонг нывгæнджытæ нырма ахуыр кæнынц æндæр бæстыхайы. Куыстыты цыды тыххæй бæлвырддæр радзурдзæн Тъехты Элинæ.
Æцæг мастерæн ахсджиаг у алы хъуыддаг дæр. Чызджытæ кæнынц æрмæстдæр сæ процессы куыст. Тауаситы Сослæнбеджы номыл аивадон скъолайы сывæллæттæ ахуыр кæнынц цыппар сменæйы. Уымæн æмæ аивад цымыдисаг у бирæтæн.
Декабры сывæллæтты аивадон галерей «На Васильевском»-ы ацыд цæгатирыстойнаг сывæллæтты куыстыты равдыст «Давным – давно у солнца были дети». Ацы цитатæ у Нарты кадджытæй ист. Дзæуджыхъæу æмæ Санкт – Петербург æмгуыстад кæнын райдыдтой 2004-æм азы æмæ уæдæй нырмæ се хсæн сырæзт егъау проект.
Ныр Санкт–Петербургæй уазджытæ ссыдысты, цæмæй æрдзурой, фæззæджы цы равдыст уыдзæн, ууыл. Куыд зæгъынц, афтæмæй æвзонг нывгæнджытæ хорз цæттæ сты.
Ацы фæзы сарæзтой цымыдисаг музей – сывæллæтты нывты æппæтадæмон музей. Бирæ азты куыстытæ фембырд кодтой дунейы 87 бæстæйæ. У Европæйы фыццаг егъау коллекцитæй иу. Тагъд рæстæджы музей сног уыдзæн.
Ацы аз скъолайы цалцæггæнæн æмæ реставрацион куыстытæ фæуыдзысты. Скъоламæ бахизæны ис Пушкины бюст, сног кодтой бæстыхайы историон хуыз. Ахуырдзаутæ æнхъæлмæ кæсынц, цалцæггæнæн куыстыты кæронмæ, цæмæй ахуыр кæнын райдайой ног бæстыхайы.
