Бакуыста йыл авторты коллектив, йæ сæргъы Цæгат Ирыстоны гуманитарон æмæ социологон иртæстыты институты директор Хъаныхъуаты Зæлинæ
Республикæ Цæгат Ирыстон-Аланийы тыххæй фæлгæсæн статья хаст æрцыд «Чырыстон дины энциклопедийы» 62-æм томмæ. Статья арæзт у 17 сыфæй. Бакуыста йыл авторты коллектив, йæ сæргъы историон наукæты доктор, профессор, Цæгат Ирыстоны гуманитарон æмæ социологон иртæстыты институты директор Хъаныхъуаты Зæлинæ. Наукон фæллой ма саив кодтой хъæздыг иллюстрацион æрмæгæй. Уый та у Ирыстоны политикон картæ, Тæтæртупы мæсыг, Сунниттаг мæзджыт æмæ раздæры персайнаг мæзджыты бæстыхай. «Чырыстон дины энциклопеди» – у сæрмагонд рауагъд. Цæмæй мыхуыры рацæуа, уый тыххæй йын редакци æмæ арфæ ракæны Мæскуыйы æмæ æппæт Уырысы Патриарх 2000-æм азæй фæстæмæ. Аргъуанты наукон центры сайты куыд фæбæрæг кодтой, афтæмæй Чырыстон энциклопедийы 62 томы ирдæй æвдисынц хъæздыг географи. Райдай Севастополæй, Цæгат Ирыстон-Аланийæ æмæ Сейшелаг сакъадæхтæй æмæ Мæскуыйы Патриархаты скæсæйнаг Япойнаг чырыстон аргъуанæй фæуы.