Бакуыстой йыл, цæмæй адæмæн дæттой æвзæрстыты тыххæй бæлвырд информаци
Цæгат Ирыстон архайы пилотон проект «Мобилон хайадон æвзарæн къамис»-ы. Бакуыстой йыл, цæмæй адæмæн дæттой æвзæрстыты тыххæй бæлвырд информаци. Хайадон æвзарæн къамисты уæнгтæ хæдзæрттыл зилынц, æмæ адæмимæ ныхас кæнынц.
Сæрмагонд хызын йе уæхскыл, афтæмæй та Гиоты Рустам рараст радон æрзылд саразынмæ. Йæ нысан у хуынды гæххæттытæ раттын æмæ адæмæн радзурын, цы æвзæрстытæ æрбахæстæг кæнынц, уыдоны тыххæй.
Ацы куыст æххæстгонд цæуы пилотон проект «Мобилон хайадон æвзарæн къамис» æххæстгæнгæйæ. Къамисты минæвæрттæ пайда кæнынц планшеттæй. Уыдоны ис сæрмагонд æфтуан. Нысангонд дзы цæуынц æвзарджыты бæрæггæнæнтæ æмæ сæ дзуæппытæ фæрстытæн.
Æрфарсты фæстæ информаци автоматизацигонд системæмæ гæсгæ æрвыст æрцæуы сæйраг æвзарæн къамисмæ. Пилотон проект царды уадзыны рæстæгмæ къамисты уæнгтæ республикæйы æрзылдысты 10 мин адрисæй фылдæрыл. Уыдонæй 6 мины бæрц – Кировы районы.
Æдæппæтæй районы байгом уыдзæн 13 æвзарæн хайады. Схъæлæс кæныны бар уыдзæн 18 мин 402 адæймагæн. Æппæтæй стырдæр хайад уыдзæн Елхоты, бынæттон культурæйы хæдзары.
Æвзæрстытæм цæттæ кæныны процесс цæуы пъланмæ гæсгæ, загътой территориалон æвзарæн къамисы. Арæзт æрцæудзысты æппæт уавæртæ, цæмæй алкæмæндæр схъæлæс кæныны фадат уа, уый тыххæй.
Кировы районы уыдзæн æппæтæй фылдæр æвзарæн кампанитæ. Æдæппæтæй та 9-æм æмæ 10-æм сентябры æвзæрстытæ уыдзысты республикæйы 5 районы.
