зæуджыхъæуы ацы къабазы сфидар кодтой сæрмагонд картæтæ
Нырыккон домæнтæм гæсгæ æппæт бæстыхæйттæ хъуамæ аразой сейсмикон æдасдзинады фæтк хынцгæйæ. Турчы æмæ Сирийы цы æвирхъау цаутæ æрцыд, уыдоны фæстæ æппæт дуне мæты бафтыдта аразæг объектты хæрзхъæддзинады фарста. Дзæуджыхъæуы ацы къабазы сфидар кодтой сæрмагонд картæтæ. Ис, зæххынкъуысты ахстдзинад бæстыхæйттыл хъуамæ чи фæкъаддæр кæна, ахæм технологитæ дæр. Бæлвырддæр радзурдзæн Хъайтмазты Дзерассæ.
Цæгат Ирыстон, Цæгат Кавказы хыгъды нымад у Уæрæсейы 3 æппæтæй активондæр сейсмикон зонæтæй иуыл. Нырма Советон Цæдисы специалисттæ райдыдтой территориты сейсмикон уавæры картæтæ аразын. Уыдон хынцгæйæ фидаргонд æрцыдысты цæрæн хæдзæрттæ æмæ социалон объекттæ аразыны домæнтæ.
Ивгъуыд æнусы 70-æм азты Дзæуджыхъæуы хæдзæрттæ ног нормативтæм гæсгæ аразын райдыдтой, ома, сейсмикон æдасдзинады домæнтæ æххæстгæнгæйæ. Хъуамæ бафæрæзтаиккой 7 баллы онг зæххынкъуыстæн.
Абон горæты сейсмикон æгъдауæй фидар чи нæу, уыцы бæстыхæйтты номхыгъды ис 14 бирæфатерон хæдзары. 2015-æм азы адæмы ахæм хæдзæрттæй ногтæм ивыны прграммæмæ гæсгæ арæзт æрцыд фондз 9-уæладзыгон хæдзары, ног цæрæнуæттæ райстой 395 бинонтæ.
2011-æм азы арæзт æрцыд Дзæуджыхъæуы микрорайонты сейсмикон картæ. Радих дзы кодтой, 7,8 æмæ 9 баллы онг зæххынкъуыстытæй тæссаг кæм у, ахæм 3 зонæйы. Уыцы бæрæггæнæнтæй хъуамæ ахадгæйæ пайда кæной проектаразджытæ ног бæстыхæйтты хицæндзинæдтыл кусгæйæ.
Хъæбæлоты Билары уынджы 20-æм бирæфатерон хæдзар хъуамæ бафæраза 9 баллы онг зæххынкъуыстæн. Домæнтæм гæсгæ, ацы хайы 6 уæладзыгæй бæрзонддæр аразæн нæй. Сыхаг бæстыхæйттæ дæр уыцы технологимæ гæсгæ арæзт цæуынц.
Социалон объектты сейсмикон фидардзинады домæнтæ куыд æххæстгонд цæуынц, уымæ цæст дары республикæйы арæзтады министрад. Стадион «Спартачы» арæзтад цæуы сæрмагонд картæ хынцгæйæ.
Фæстаг азты республикæйы зæххы бын æнкъуыстыты бæрц фæбæрзонддæр. Уымæ гæсгæ, ахуыргæндтæ агурынц ног фадæттæ. Хъуылаты Руслан бакуыста хи технологийыл. Уый фæрцы хъуамæ æнкъуыстыты архайд бæстыхæйттыл къаддæр зына. Фæлварæнтæ куыд æххæст кæны, уыцы видео хæххон-металлургон институты доцент фыццаг хатт равдыста телеканал «Россия-24»-йы регионалон эфиры.
Æнкъуыстытæ бæстыхайыл нæ ахадынц, нæй инерцион тыхтæ, уымæ гæсгæ нæй хæлдытæ дæр. Йæ проектæн Хъуылаты Руслан райста патент. Куыст дарддæр цæуы.
