Скъолайæн æнæмæнг хъæугæ дзаумæттæ, техникæ æмæ чингуытæ
Цæгат Ирыстонæй гуманитарон æххуыс арвыстой Запорожьейы облæсты Черниговы районмæ. Скъолайæн æнæмæнг хъæугæ дзаумæттæ, техникæ æмæ чингуытæ. Ног ахуыры азмæ æхсызгон лæвæрттæ бынатмæ бахæццæ кодтой Цæгат Ирыстоны ахуырады æмæ наукæйы министр Алыбекты Эллæ, стæй парламенты депутаттæ Саулохты Сæрмæт æмæ Андрей Попов. Уæрæсейы ног регионты ныртæккæ тынг нæ фаг кæнынц компьютертæ æмæ принтертæ. Алыбекты Эллæ зæрдæ бавæрдта, фарста алыг кæнынæй. Уымæй дарддæр, акци «Чиныг ме мбалæн» æххæст кæнгæйæ, Черниговы районмæ арвыстой 6 мины æмæ 500 чиныджы. Аивадон æмæ нвукон-популярон литературæ, ахуыргæнæн чингуытæ æмæ энциклопедитæ. Фысымтæ тынг бузынг фесты сывæллæтты къухвæллойæ. Арфæйы ныхæстæ загътой, се мгæрттæн писмотæ чи ныффыста, уыдонæн се ппæтæн дæр. Уæлдай æхсызгондæр та уыд чингуытыл фыст – «Ирыстонæй уарзондзинадимæ».
