Интеллектуалон ерысы хуыздæр сси республикон физикон-математикон лицей-интернаты ахуырдзауты командæ
Цæгат Ирыстоны фæцис республикæйы сæргълæууæджы кубок рамбулыны фыццаг турнир 3 наукæйæ. Интеллектуалон ерысы хуыздæр сси республикон физикон-математикон лицей-интернаты ахуырдзауты командæ. Дыккаг бынат бацахстой дзæуджыхъæуккаг скъолаты ахуырдзаутæ, æртыккаг та – Горæтгæрон районы командæ. Уæлахиздзауты æмæ призерты схорзæхджын кодта Цæгат Ирыстоны сæргълæууæг. Сергей Меняйло куыд загъта, афтæмæй турниры сæйраг нысан уыд, сывæллæтты разæнгард кæнын наукæтæ ахуыр кæнынмæ. Турнир бацæттæ кæнынмæ се вæрæн бахастой республикæйы уæлдæр ахуыргæнæндæттæ дæр. Сергей Меняйло фехъусын кодта, иннæ аз турнир кæй скæндзысты гом. Сæ бон дзы уыдзæн архайын иннæ регионтæй сывæллæттæн дæр. Фæзындзæн ма дзы ног дисциплинæтæ – хими æмæ биологи. Уæ зæрдыл уын æрлæууын кæндзыстæм, 2 къуырийы дæргъы 8-æм, 9-æм æмæ 10-æм кълæсты ахуырдзаутæ сæ зонындзинæдтæ бæлвырд кодтой математикæйæ, информатикæйæ æмæ физикæйæ. Ерысы бацархайын бафæндыд 500 сывæллонæй фылдæры.
