20-æм æнусы райдиан чи рацыд, уый къопитæ хъахъхъæд æрцыдысты республикæйы архивы
110 азы фæстæ Цæгат Ирыстоны ногæй мыхуыры рауагътой Тхостаты Саукуыдзы чиныг «Путевые очерки ирона». 20-æм æнусы райдиан чи рацыд, уый къопитæ хъахъхъæд æрцыдысты республикæйы архивы. Фæлæ чиныджы цалдæр скъуыддзагыл бахъуыд ногæй бакусын. Текстытæ сног кæныны зын æмæ бæстон куыст бакодтой Цæгат Ирыстоны историйы æмæ археологийы институты кусджытæ. Тхостаты Саукуыдз йæ цард сбаста рухстауæн куыстимæ, æмæ йæ райгуырæн Беслæны байгом кодта скъола. Цæмæй йæ бæллиц царды рауадза, æмæ фæрæзтæ бакуса, уый тыххæй та абалц кодта скæсæйнаг-китайаг æфсæнвæндаджы арæзтадмæ. Уыцы цаутæ фæстæдæр ирдæй равдыста йæ чиныджы. Ног рауагъдмæ ма хаст æрцыдысты: чиныг «Путевые очерки Ирона», фольклорон текстытæ, Хетæгкаты Къостайы тыххæй мысинæгтæ, автобиографион уацтæ, стæй авторы тыххæй документтæ æмæ æрмæджытæ.
