Фойейы аивадуарзджытæн бацæттæ кодтой хуызистыты равдыст æмæ алы постановкæтæй декорациты экспозици
Цæгат Ирыстоны паддзахадон академион театры кадджын уавæры байгом кодтой 91-æм сезон. Фойейы аивадуарзджытæн бацæттæ кодтой хуызистыты равдыст æмæ алы постановкæтæй декорациты экспозици. Ног сезон байгом кæнын сфæнд кодтой Цæголты Василийы романмæ гæсгæ спектакль «Хæхты минæвæрттæ»-й. Ацы азмæ ирон театры къордмæ стыр фæндтæ ис – премьерæтæ æмæ гастрольтæ. Ноябры труппæ абалц кæндзæн Мæскуымæ спектакль «Чысыл принц»-имæ. Бæлвырддæр радзурдзæн Хъайтмазты Дзерассæ.
Театралон цард ам райдыдта æртыккаг дзæнгæрæгæй бирæ раздæр. Бацæуæны уазджытыл æмбæлынц зонгæ сценикон фæлгонцтæ. Гæздæнты авд æфсымæрæн цыртдзæвæн, «Демон»-æй бæх, «Чысыл принц»-æй хæдтæхæг æмæ «Паддзах Лир»-æй композицитæ зæрдыл лæууын кæнынц, театрдзаутæ цы спектакльтæ бауарзтой, уыдон.
91-æм сезон байгом кодтой репертуары æппæтæй егъаудæр спектакльтæй иу – «Хæхты минæвæрттæ»-й. æвæрд у Цæголты Василийы романмæ гæсгæ. æвдыст дзы цæуы ирон минæвæртты балц ус-паддзах Елизаветæмæ Уæрæсейы хыгъдмæ бацæуыны нысанимæ. Уый у 2 адæмыхатты иудзинады æмæ цы иумæйаг фæндаг равзæрстой, уый тыххæй истори.
Сценæйы – ивгъуыдæй цаутæ, хъайтарты хъысмæттæ та систы стыр историйы хай. Уалыты Гивийы постановкæйы архайы театры труппæйы фылдæр хай.
Спектакль арæзт у 2 хайæ. Декорацитæ, костюмтæ, музыкæ æмæ рухс ирдæй æвдисынц уæды рæстæг. Аивадуарзджытæн æххуыс кæнынц бамбарын сценæйыл цы цæуы, уый.
Театры ног сезон æххæст уыдзæн премьерæтæй. Репертуары фæзындзысты уырыссаг æмæ фæсарæйнаг классикæйы, стæй национ драматургийы уацмыстæм гæсгæ спектакльтæ. Проектты иу хай цæттæ кæнынц равдыстмæ, иннæтæ та нырма пълæнтты сты.
Дарддæр цæудзæн иннæ регионтæй театртимæ æмгуыстад. Ивгъуыд сезоны Ирон театр гастрольтимæ уыд Липецкы æмæ Абхазы, æрæджы та Грознайы фестивалы равдыстой спектакль.
Алы ног сезонæн дæр йæхи истори, алы спектаклæн дæр – йæхи цард. 91-æм сезоны занавес систой. Разæй та аивадуарзджытæм æнхъæлмæ кæсы бирæ ног сфæлдыстадон фембæлдтытæ.
