Уыдон æххуыс кæндзысты, хæстон цауты архайджытæн реабилитаци ацæуынæн
Хетæгкаты Къостайы номыл Цæгат Ирыстоны паддзахадон университеты райдыдтой психологты цæттæ кæнын. Уыдон æххуыс кæндзысты, хæстон цауты архайджытæн реабилитаци ацæуынæн. Психологон наукæты кандидат, психологийы кафедрæйы доцент Юлия Афанасьева бакуыста хицæн программæйыл, сæрмагонд æфсæддон операцийы архайджытæн. Ныртæккæ уыцы программæимæ тесты хуызы зонгæ кæны психологты къорд. Бæлвырддæр хабæрттæ радзурдзæн Фидараты Маринæ.
Нæмгуыты æмæ сармадзанты æхситты бынмæ, æмæ хæсты цæхæры арфы. Ахæм уавæрты сæрмагонд æфсæддон операцийы архайджытæ вæййынц алы бон дæр. Сæ цард раздæры хуызæн никуы уал уыдзæн. Тохы быдыры хæцынц ныхмæлæуджытимæ, сабыр арвы бын та – сæ хъуыдытимæ.
Зын уавæрты канд æфсæддонтæ нæ вæййынц, фæлæ ма сыл æхсæвæй – бонæй чи хъуыды кæны, уыдон. Сæ хæстæджытæ æмæ хиуæттæ. Сæ размæ сæвзæрынц æндæр ахсджиаг фарстатæ дæр. Куыд ис æвзæр хъуыдытæй фæхицæн уæвæн, куыд ис дæ хæстæгимæ бастдзинад нæ уынын, æмæ афтæ дарддæр.
Ахæм уавæрты хъæуы психологы æххуыс бацагурын, – зæгъынц специалисттæ. Алкæимæ дæр бакусынц хицæнæй, алкæмæ дæр ссарынц фæндаг. Хорз специалисты та бирæ агурын нæ бахъæудзæн. Фæлтæрддзинад фылдæргæнæн курсытæ сын сты ахадгæ æххуысы фæрæз.
Программæйы уал бацархайдтой 13 адæймаджы. Куыд зæгъынц, афтæмæй пайда информаци бирæ. Ахуыр сæ кæнынц канд адæймаджы лыггæнинаг фарстайыл бакусыныл нæ, фæлæ ма йемæ ныхас кæныныл дæр. Уымæн æмæ сæ алкæимæ дæр хъæуы хицæнæй æмæ арæхстджынæй кусын.
Программæимæ канд дзæуджыхъæуккаг психологтæ нæ бакуыстой, фæлæ ма нæ бæстæйы алы регионты специалисттæ дæр. Куыд зæгъынц, афтæмæй райстой хъæугæ зонындзинæдтæ.
Темæ се нцонтæй нæу, фæлæ тынг актуалон. Уымæ гæсгæ йæм хъæуы лæмбынæг цæстдард. Стæй, кæй зæгъын æй хъæуы, специалистты нымæц дæр хъуамæ фылдæр уа. Цалынмæ æфсæддонтæ хæсты быдыры нæ Фыдыбæстæйы сæраппонд тох кæнынц, уæдмæ сæм ам та æнхъæлмæ кæсынц, баххуыс кæнынмæ цæттæ чи у, ахæм адæм.
