Зондамонæджы кадæн ахуыргæнæндоны ацыд, республикæйы курдиатджын сывæллæтты чи сæмбырд кæны, ахæм олимпиадæ математикæйæ
40 азæй фылдæр снывонд кодта ахуырадæн, сæдæгай курдиатджын сывæллæттæн баххуыс кодта фæндаг зонадмæ ссарынæн. Цæгат Ирыстоны сбæрæг кодтой, республикæйы физикон-математикон лицей кæй ном хæссы, уыцы сгуых педагог Абайты Мюраты райгуырды 100 азы бон. Зондамонæджы кадæн ахуыргæнæндоны ацыд, республикæйы курдиатджын сывæллæтты чи сæмбырд кæны, ахæм олимпиадæ математикæйæ. Бæстондæр хабæрттæ радзуырдзæн Чехойты Фатимæ.
11 азæй фылдæр Абайты Константины фырт Мюрат разамынд лæвæртта физикон-математикон скъола-интернатæн. Уыцы рæстæг байгом сты фыццаг математикон кълæстæ. Уæд цы традицитæ ныффидар сты, уыдон дарддæр æххæст кæнынц ахуырдзауты ног фæлтæртæ. 8-æм къласон Андрей Печенов активонæй архайы интеллектуалон ерысты æмæ æдзух бацахсы призон бынæттæ. Абайты Мюраты номыл 5-æм олимпиадæйы йын саккаг кодтой 2-аг къæпхæны диплом.
Абайты Мюраты номыл гом математикон олимпиадæ лицейы саразынц 2022-æм азæй фæстæмæ. Фархайынц дзы скъоладзаутæ æппæт республикæйæ. Ацы ерыс у 5-æм æмæ арæзт æрцыдис педагогы 100 азы райгуырды боны фæдыл. Юбилейы кадæн лицейы сарæзтой бæрæгбон, схорзæхджын дзы кодтой олимпиадæйы уæлахиздзауты æмæ призерты.
40 азæй фылдæр Абайты Мюрат снывонд кодта педагогикæ æмæ адæмон ахуырадæн. Дæрддзæф хъæутæй курдиатджын сывæллæттæн æххуыс кодта зонындзинæдтæ исынæн, стæй стыр зонадмæ фæндаг байгом кæнынæн. Бындур цы скъола-интернатæн сæвæрдта, уый сси республикæйы хуыздæр ахуыргæнæндæттæй иу.
Абайты Мюраты кадæн арæзт мадзалмæ æрбацыдысты йæ хиуæттæ, æмкусджытæ, лицейы раздæры азты директортæ. Уазджыты *хсæн — республикæйы ахуырады æмæ зонады министры хæдивæг Габеты Вадим.
Рæстæджы цыдимæ лицейы фæзынынц ног фæлтæртæ, фæлæ ахуыргæнæндоны сæйраг нысантæ сты æнæивгæ. Æмæ цалынмæ скъоладзаутæ тырнынц ног зонындзинæдтæ исынмæ, сæ размæ *вæрынц ног хæстæ æмæ сын бантысынц фыццаг уæлахизтæ, уæдмæ Абайты Константины фырт Мюраты хъуыддаг цæрдзæн.
