Ахæм мадзæлтты архайгæйæ рæзгæ фæлтæр исынц фæлтæрддзинад æмæ зонгæ кæнынц бæстæйы ахуыргæндтимæ
Цæгат Ирыстоны скъоладзаутæ сæхи æнтыстджынæй равдыстой æппæтуæрæсеон олимпиадæ «Софиум»-ы æмæ æппæтадæмон наукон форум «Шаг в будущее»-йы. Ахæм мадзæлтты архайгæйæ рæзгæ фæлтæр исынц фæлтæрддзинад æмæ зонгæ кæнынц бæстæйы ахуыргæндтимæ. Уымæй дарддæр ма сæ бон у уæлæмхасæн балтæ райсын иумæйаг паддзахадон фæлварæны хатдзæгтæм, стæй Уæрæсейы курдиатджын сывæллæтты реестрмæ бацæуын. Бæлвырддæр радзурдзæн Хъайтмазты Дзерассæ.
Дзæуджыхъæуы 7-æм скъолайы 11-æм къласы ахуырдзау Цакъоты Дианæ сси æппæтуæрæсеон олимпиадæ «СОфиум»-ы уæлахиздзау. Бацархайдта дзы историйы ахуыргæнæджы амындæй. Дианæ куыд зæгъы, афтæмæй юриспруденци йæ зæрдæмæ рагæй цæуы, æмæ фæнд кæны уæлдæр ахуыргæнæндонмæ ацы къабазмæ гæсгæ бацæуын. Æппæтуæрæсеон олимпиадæйы уæлахиз æй йæ нысанмæ æрбахæстæг кæндзæн. Призон бынæтты тыххæй скъоладзаутæ райсдзысты уæлæмхасæн баллтæ иумæйаг паддзахадон фæлварæнты хатдзæгтæм, стæй хаст æрцæудзысты бæстæйы курдиатджын сывæллæтты реестрмæ.
Æппæтуæрæсеон олимпиадæ «Софиум» уыд Мæскуыйы, Уæрæсейы сæйраг æвзарæн къамисы бæстыхайы. Уыд 2 къæпхæны – регионалон æмæ федералон. Цæгат Ирыстонæй дзы архайдта 4 скъоладзауы. Дианæ цæттæ кодта 3 мæйæ фылдæр, хъæугæ æрмæджытæ ахуыр кодта республикæйы æвзарæн къамисы ахуырадон центры бындурыл.
Æрæджы ма уыд æппæтадæмон наукон форум «Шаг в будущее». Йæ проект дзы æнтстджынæй бахъахъхъæдта Дзæуджыхъæуы 22-æм скъолайы ахуырдзау Хъамболты Арсен. Лæппу бацæттæ кодта роботизацигонд къух фæлмæн æрцахстимæ. Къухы æппæт хæйттæ мыхуыргонд æрцыдысты 3D принтерыл, æрцахсынæн хæйттæ та конд сты силиконæй. Арсен куыд зæгъы, афтæмæй йын æхсызгон уыд 3-аг бынат бацахсын. Райста хъæугæ фæлтæрддзинад.
Форум «Шаг в будущее»-мæ куыст бацæттæ кодта Мæздæджы районы Павлодольскæйы скъолайы ахуырдзау Вероника Родина дæр. Чызг робототехникæйæ архайы 2 азæй фылдæр. Йæ проект у робот-агурæг. Йемæ архайын хъæуы смартфоны фæрцы, æххæст у камерæйæ. Йæ нысан у, адæймагæн йæ бон бацæуын кæдæм нæу, ахæм бынæттæ сгарын. Вероникæйæн форумы призер суæвын нæ бантыст. Чызг куыд зæгъы, афтæмæй иннæ азмæ ног куыст бацæттæ кæндзæн æмæ бацархайдзæн призон бынат райсыныл.
Республикæйæ æппæтадæмон форум «Шаг в будущее»-йы уыд 9 скъоладзауы. Форум уыд Мæскуыйы. Архайдта дзы мин фондзсæдæ адæймагæй фылдæр дунейы алы бæстæтæй. Цæгат Ирыстоны скъоладзаутæ цæттæ кодтой ахуырадон центр «Вершина»-йы бындурыл. Методист Светлана Ивановæйы ныхæстæм гæсгæ, рæзгæ фæлтæрæн сарæзтой æппæт хъæугæ уавæртæ.
Светлана Иванова – Ахуырадон центр «Вершина»-йы методист: “Нам хочется, чтобы больше было технических работ. У нас в республики хорошо развиты гуманитарные дисциплины, естественно научные. Мы хотим, чтобы больше развивалась робототехника, прикладные айти-специальности, механика.
Форумы скъоладзаутæ сæмбæлдысты бæстæйы æнтыстджындæр ахуыргæндтимæ æмæ бабæрæг кодтой наукон инженерон центртæ. Уый фæрцы æвзонг иртасджытæ райстой, фидæны сын æххуыс чи уыдзæн, ахæм фæлтæрддзинад.
