Ахуырады æмæ наукæйы министр Алыбекты Эллæ бабæрæг кодта объекттæ, æмæ базонгæ, куыстытæ куыд цæуынц, уыимæ
Цæгат Ирыстоны цалдæр ахуыргæнæндоны цæуынц рацарæзты бындурон куыстытæ. Ахуырады æмæ наукæйы министр Алыбекты Эллæ бабæрæг кодта объекттæ, æмæ базонгæ, куыстытæ куыд цæуынц, уыимæ. Фыццаг уал уыд сывæллæтты 106-æм æмæ 99-æм рæвдауæндæтты. Фæстæдæр та — Дзæуджыхъæуы 44-æм скъолайы. Рацарæзт цæуы, национ проектты æмæ регионалон программæты фæрцы. Бæлвырддæр хабæрттæ радзурдзæн Касаты Наирæ.
106-æм сывæллæтты рæвдауæндоны бæстыхайæн бындур æвæрд æрцыди 1939-æм азы. Уыцы рæстæгмæ иу хатт дæр цалцæггонд нæ уыди. Февралы, скъолайы агъоммæйы ахуыргæнæндонæн райдыдта царды ног къæпхæн. Специалисттæ бавнæлдтой проект æххæст кæнынмæ. Ныридæгæн фесты æппæт инженерон куыстытæ, бауагътой коммуникацитæ, баивтой бæстыхайы сæр. Проекты фæлгæты балхæндзысты ног кусæнгæрзтæ æмæ хъæддзаума. Рæвдауæндон у 150 сывæллонæн. æрвылбон объекты фæллой кæны 25 адæймагæй кусæг къорд. Пъланмæ гæсгæ куыстытæ фæуыдзысты августы. Бындурон цалцæг куыд цæуы, уый федта æмæ йын аргъ скодта республикæйы ахуырады æмæ наукæйы министр Алыбекты Эллæ.
99-æм рæвдауæндоныл Алыбекты Эллæйæн экскурси скодтой, ацы бынат дыккаг хæдзар кæмæн сси, уыдон — сывæллæттæ. Гыццыл гидтæ министрæн равдыстой райдзаст агъуыстытæ, ног кусæнгæрзтæ, радзырдтой йын сæ уарзондæр ахуырты тыххæй. Ахуыргæнæндоны цалцæггæнæн куыстытæ фесты фарон. Мидæгæй йæм базылдысты уый иу, фæлæ ма специалисттæ аиуварс кодтой бирæ лыггæнинаг куыстытæ. æххæстæй баивтой инженерон коммуникацитæ, сног кодтой электрон тыхдæттæг телтæ, ныффидар кодтой бæстыхайы бындур. Рæвдауæндонмæ базылдысты национ проект «Бинонты» фæлгæты. Ахуыргæнæндоны ис 200 бынаты. Алыбекты Эллæ хатдзæгтæм гæсгæ куыд загъта, афтæмæй сабитæн ам ис æппæт хъæугæ уавæртæ æмæ фадæттæ. Уымæй уæлдай, министры фæндыд базонын, ирон æвзаг ахуыр кæныны процесс дзы куыд цæуы, уый.
Цалцæггæнæн куыстытæ æнæрлæугæйæ цæуынц 44-æм скъолайы дæр. Объект у дыууæ азы æмгъуыдмæ. Базилдзысты йæм дыууæ къæпхæнæй. Специалисттæ уал сног кодтой коммуникацитæ, 2-аг æмæ 3-аг уæладзгуыты нырыкконыл баивтой зынгхуыссынгæнæн системæ. Куыстытæ цæуынц национ проект «Фæсивæд æмæ сывæллæтты» фæлгæты.
Æмæ кæд скъолаты бындурон цалцæг кæронмæ фæхæццæ кæны, уæд рæвдауæндæттæ ног кæныны хъуыддаг та нырма у йæ тæккæ райдианы. Алыбекты Эллæ куыд фæнысан кодта, афтæмæй скъолайы агъоммæйы ахуыргæнæндæттæм зилынц горæты программæйы фæлгæты. æмæ уыцы куыст цæудзæн дарддæр дæр.
