Спорты Галуан «Манеж»-ы 3 боны ерыс кодтой Цæгат Кавказы æмæ Хуссар Федералон зылдтæй, 8 азæй 16 азы онг кæуыл цæуы, ахæм мин спортсменæй фылдæр
Цæгат Ирыстоны уыд 11-æм æппæтуæрæсеон культурон-спортивон фестиваль «Мирный Кавказ». Спорты Галуан «Манеж»-ы 3 боны ерыс кодтой Цæгат Кавказы æмæ Хуссар Федералон зылдтæй, 8 азæй 16 азы онг кæуыл цæуы, ахæм мин спортсменæй фылдæр. Сæ тыхтæ фæлвæрдтой спорты 14 хуызы. Фестивалы сæ курдиат раргом кодтой сыхаг субъектты национ сфæлдыстадон коллективтæ. Спортивон форум саразыныл бакуыстой Уæрæсейы æфсæддон хъæбысхæсты Цæдисы цæгатирыстойнаг хайад стæй нæ республикæйы физкультурæйы æмæ спорты министрад. Бæлвырддæр радзурдзæн Фидараты Маринæ.
Фæскулисæты алæууын, кафты сусæгдзинæдтыл æрдзурын æмæ сценæмæ рацæуын. Æвзонг артисттæ аивадуарзджытæн бацæттæ кодтой кафты æцæг бæрæгбон. Полькæ, романтикон вальс æмæ самба. Дзæуджыхъæуы, Мæздæджы æмæ Беслæны коллективтæ сæ архайдæй равдыстой, Кавказы кафты дуне куыд ирд æмæ цымыдисаг у, уый.
Мæздæджы адæмон кафты ансамбль «Этюд» йæхи зæрдиагæй цæттæ кодта сценæмæ рацæуынмæ. Бакуыстой ирд кафт фламенкойыл. Репетицитæ кодтой мæйæ фылдæр. Афтæмæй сæ алы фезмæлд дæр уыд дæнцæгæн хæссинаг. Ирд æнкъарæнтæ æмæ драматизм. Алы элементы дæр ис арф мидис. Уымæнæ æмæ сценæйы хатгай ныхæстæй ахсджиагдæр вæййы фезмæлд.
Спортивон кафты конкурс, фестиваль «Мирный Кавказ» æххæст кæнгæйæ, нæ республикæйы арæзт æрцыд 7-æм хатт. Ацы аз сæхи категориты хуыздæры ном райсыныл ерыс кодтой 6 коллективы. Фæсивæд сæ курдиат раргом кодтой 2 кары категорийы. 9-æй 12 азы онг, стæй 13-æй 15 азы онг. Сценæмæ рацыдысты куыд иугæйттæй, афтæ къæйттæй æмæ ансамбльтæй. Уымæ гæсгæ хуымæтæг фестиваль нæу, фæлæ ма хи равдисыны ахсджиаг мадзал дæр.
Уæвгæ, Мирный Кавказ – у цымыдисаг фестиваль. Уымæй дарддæр ма у – фæсивæдæн сæ зонындзинæдтæ равдисыны хорз фадат. Ам сын фæзыны ног æмбæлттæ, стæй ма базонгæ вæййынц кæрæдзийы фæлтæрддзинадимæ.
Æппæтуæрæсеон культурон-спортивон фестивалы республикон къæпхæны уæлахиздзаутæ сæ хъарутæ бафæлвардзысты Цæгат Кавказы ерысты. Нæ фæсивæд ныридæгæн дæр цалдæр категорийы уыдысты уæлахиздзаутæ. Фæлæ ацы аз се нтыстдзинæдтыл фæнд кæнынц бафтауын. Кафты пьедестал бацахсын нысан кæнынц ансамбльтæ дæр.
