Сывæллæттæ бабæрæг кодтой ахуыргæнæдоны музей, стæй бæрзонд технологон куыстуат «Баспик»
Цæгат Кавказы хæххон металлургон институты арæзт æрцыд профориентацион экскурси Кæрдзыны хъæуы скъоладзаутæн. Сывæллæттæ бабæрæг кодтой ахуыргæнæдоны музей, стæй бæрзонд технологон куыстуат «Баспик». Институт йемæ рагæй кæны æмгуыстад. Ахæм мадзæлттæ ахуыргæнæдоны арæх саразынц. Бæлвырддæр хабæрттæ радзурдзæн Чехойты Фатимæ.
Цæгат Кавказы хæххон металлургон институтмæ æрбацыдысты 5-æм æмæ 9-æм кълæсты ахуырдзаутæ. Сты хуыздæртæ – ахуыры æмæ спорты, стæй – конкурсты уæлахиздзаутæ. Ахуыргæнæндонмæ хуымæтæг балц нæу, у æххуыс фидæны фæндаг равзарынæн. Кæрдзыныхъæуы скъолайы минæвæрттæн чиныджы сæргонд нæу – зонгæ кæнынц ногдзинæдтимæ.
Уазджыты *хсæн – Гадзиаты Кристинæ. Æрæджы конкурс «Бынæттон хиуынаффæйады истори» – йы бацахста фыццаг бынат, республикæйы кад бахъахъхъæдта æмбæлгæ уагыл. Кристинæйы ныхæстæм гæсгæ, хъæуы цæрджытæй бирæтæ фæзæгъынц, хæрзхъæд ахуырад райсыны тыххæй ацæуын хъæуы Мæскуы, кæнæ æндæр стыр горæттæм, зæгъгæ. Фæлæ чызг бæлвырдæй зоны, афтæ чи хъуыды кæны, уыцы адæмæн ахæм балцытæ сæ зондахаст аивиккой.
Балцы хай – экскурситæ институты музеймæ, стæй Дзæуджыхъæуы технологон центр «Баспик»-мæ. Минералтæ, цæххытæ, рагон денджызон хъузджытæ – сывæллæттæ федтой цымыдисаг экспонаттæ. Сæйраг хæс – баххуыс кæнын фидæны дæсныйад равзарынæн, стæй равдисын – хæрзхъæд ахуырад райсæн ис ам, нæхи республикæйы. Алы экскурси дæр æрмæст минералты эспозицийы фендыл нæ фæвæййы. Скъоладзаутæн радзурынц кусæнгæрзты миниуджыты æмæ микроэлектроникæйы сусæгдзинæдты тыххæй. Центры рауагъды æмæ зонады директоры ныхæстæм гæсгæ, скъоладзаутимæ фембæлдтытæ арæх саразынц, сывæллæтты уынд сын æхсызгон вæййы алы хатт дæр.
Гæнæн ис æмæ абоны уазджытæй цалдæр азы фæстæ исчи суа центры кусæг. Ахуыргæнæндоны разамонджытæ фæнд кæнынц ахæм балцытæ арæхдæр аразын.
