Ацы хатт къуылымпыдзинæдтæ сæвзæрдысты доны куыстимæ
Цæхæрадæтты æнæкоммерцион æмбалад «Наука»-йы цæрджытæ та ногæй тыхсынц сæ уавæртæй. Ацы хатт къуылымпыдзинæдтæ сæвзæрдысты доны куыстимæ. Кæнæ æппындæр нæ вæййы, кæнæ та фаг нæ кæны. Адæм сæхи фæрæзтæй цы донцъирæн сæвæрдтой, уый дæр сын нал æххуыс кæны.
Цæхæрадæтты æмбалад «Наука»-йы донимæ къуылымпыдзинæдтæ раджы райдыдтой, дзуры Алексей Васильев. Нæлгоймаг ам цæры 4 азæй фылдæр. Уыцы рæстæгмæ лыггæнинаг фарстатæ бирæ хæттыты сæвзæрд. Алексейы ныхæстæм гæсгæ, фæстаг аз алцыдæр хорз куыста, фæлæ 9-æм августы дон суткæмæ ахуыссын кодтой, æмæ та уый фæстæ къуылымпыдзинæдтæ райдыдтой.
2 азы размæ адæм сæхи фæрæзтæй балхæдтой донцъирæн. Фæлæ ныр уый дæр нал æххуыс кæны.
Адæм бирæ хæттыты сидтысты алыхуызон ведомствæтæм. Фæлæ закъонмæ гæсгæ, мидаивгæнæн фарстатæ, сæ хыгъды коммуналон хызтæ ног кæнын дæр, цæхæрадæтты æмбаладты цæрджытæ хъуамæ сæхæдæг лыг кæной. Уымæ гæсгæ доны хæтæлтæ ивыны хъуыддаг дæр хауы сæхимæ. Куыстуат «Владсток»-ы сæйраг инженер Калоты Сослан куыд загъта, афтæмæй адæмæн баххуыс кæндзысты зæронд хæтæлтæ баивын, фæлæ фæрæзтæ хъуамæ сæхæдæг æрæмбырд кæной.
Сæ лыггæнинаг фарстатæ æмбалады цæрджытæн сæхи бон алыг кæнын нæу. Ныртæккæ æнæкоммерцион организацийæн сæрдар дæр нæй. Æмбалад та цæуы банкротдзинады процедурæ. Адæм сæ зæрдæ дарынц Дзæуджыхъæуы администрацийы æххуысыл. Фæлæ уый гæнæн ис, æрмæст бæлвырд уавæрты. Уыдон та æххæстгонд нæма сты.
