Йæ автор æмæ царды уадзæг у нывгæнæг Дзиуаты Земфирæ
Зымæгон историтæ. Тугъанты Махарбеджы номыл музейы байгом ахæм сæргондимæ равдыст. Проект ныридæгæн сси традицион. Йæ автор æмæ царды уадзæг у нывгæнæг Дзиуаты Земфирæ. Цымыдисаг равдысты сæйраг нысан у – Ног азы æмæ Цыппурсы агъоммæ адæмæн бæрæгбоны æнкъарæнтæ балæвар кæнын. Равдысты фенæн ис куыд цымыдисаг нывтæ, афтæ заз бæласы хъазæнтæ дæр. Экспозици фенæн уыдзæн 15-æм январы онг. Тъехты Элинæ радзурдзæн бæлвырддæр.
Зымæгон историтæ нывгæнджыты цæстытæй. Ахæм сæргондимæ равдыст бацæттæ кодтой радон хатт Цæгат Ирыстоны аивадуарзджытæн. Се ппæтæн дæр фадат ис куыд нывтæм, афтæ куклатæм бакæсынæн дæр. Мадзал сарæзта Уæрæсейы нывгæнджыты цæдисы уæнг, зындгонд куклатæ аразæг Дзиуаты Земфирæ. Ног азы агъоммæ йæ фæндыд республикæйы цæрджыты зæрдæтæ бахъæлдзæг кæнын.
Дзиуаты Земфирæ, Уæрæсейы нывгæнджыты цæдисы уæнг: «Нæ равдыстæй нæ фæндыд скæнын бæрæгбон куыд нæхицæн, афтæ нæм чи рбацæуа, уыдонæн дæр. Куыстытæ нымайгæ нæ кодтон, фæлæ сты 80 фылдæр».
Экспозицийы ис куыд зындгонд, афтæ æрыгон нывгæнджыты 30 куысты онг. Уыдоны хсæн нывгæнæг Айларты Владимиры 3 нывы дæр. Куыд зæгъы, афтæмæй сæ хуымæтæджы нæ равдыста. Фæндыд æй адæмæн бæрæгбоны æнкъарæнтæ балæвар кæнын.
Айларты Владимир, нывгæнæг: «Нывгæнгæйæ мæм бирæ æнкъарæнтæ вæййы, фæлæ мæ куыст куы сцæттæ вæййы, уæд дзы разыны бирæ фылдæр хъуыдытæ. Вæййы афтæ дæр, æмæ дзы хуымæтæг адæймаг нывгæнæгæй фылдæр мидис раиртасы. Равдыст республикæйы сæйрагдæр музейтæй иуы конд кæй æрцыд, уый дæр бирæтыл дзурæг у. Чи рбацæуа, уый æнæмæнг йема ахæсдзæн исты хъуыдытæ».
Равдыст хорз у уымæй, æмæ дзы удæнцой ссардзысты нывтæ æмæ куклатæ уарзаг адæм. Уæдæ заз бæлас дæр срæсугъд кæндзысты сæрмагонд хъазæнтæ. Равдыстмæ бакæсынмæ æрбацыдысты æндæр районтæй дæр. Уыдысты дзы фысджыты цæдисы уæнгтæ, стæй журнал «Ногдзау»-ы сæйраг редактор дæр.
Сæлбиты Дианæ, журнал «Ногдзау»-ы сæйраг редактор: «Мæнæн ацы равдыст бынтон æхсызгон у, уымæн æмæ йæ бацæттæ кодта нæ журанлы аивадон редактор. Алы хат дæр йæ равдыстмæ æрбацæуын тынг æхсызгонæй, уымæн æмæ йæ куыстыты бавæры йæ уды хай. Уымæй уæлдай ма æрæмбырд кæны йæхи хуызæн курдиатджын нывгæнджыты куыстытæ. Уыдонмæ кæсын та уæлдай æхсызгон вæййы».
Равдыст цæуы 2-аг аз. Вæййы сæрды æмæ зымæджы. Йæ саразæг Дзиуаты Земфирæйы фæнды, цæмæй уа æрвылазон. Уымæ гæсгæ равдысты рæстæг кæны алыхуызон цымыдисаг мадзæлттæ.
Равдыстмæ бакæсынæй уæлдай ма республикæйы цæрджытæн са бон бацархайын у лотереяйы. Хатдзæгтæ скæндзысты январы, равдыст куы фæуа, уæд. Уæлахиздзауæн йæ бон равзарæн уыдзæн Дзиуаты Земфирæйы сæрмагонд цыппар куклайæ иу.
