Сæрмагондæй та, къордты бирæ сабитæ кæй ис, уымæ
Ахсджиаг социалон-экономикон фарстатыл ацы къуыри Мæскуыйы æрныхас кодтой Уæрæсейы президент Владимир Путин æмæ Цæгат Ирыстоны сæргълæууæг Сергей Меняйло. Президент фæсидт регионы разамонæгмæ сывæллæтты рæвдауæндæтты уавæрмæ æргом аздахыны тыххæй. Сæрмагондæй та, къордты бирæ сабитæ кæй ис, уымæ. Ацы фарста сбæлвырд кæныныл бацархайдта не сфæлдыстадон къорд. Ныхас бар Хъайтмазты Дзерассæйæн.
Дзæуджыхъæуы сывæллæтты 180-æм рæвдауæндоны хъомылгæнинаг Вероникæ æвдисы йæхи къухтæй конд тæрхъусы. Фæззæгыл сабитæ сæмбæлдысты каштантæй, хус сыфтæй æмæ æндæр æрдзон æрмæджытæй конд композицитимæ. Уыдонæй саив кодтой ног рæвдауæндон. Ацы объект арæзт æрцыд нырыккон домæнтæ хынцгæйæ национ проект «Ахуырад»-мæ гæсгæ. Ис дзы 280 бынаты. 16 къорды, спортивон æмæ хъазæн зонæтæ, музыкалон ахуырты æмæ физкультурæйы зал, медицинон блок, логопеды æмæ уæлæмхасæн ахуырты кабинеттæ. Сывæллæтты алывæрсыг райрæзтæн ис æппæт уавæртæ.
Сывæллæтты мыггæгтимæ карточкæтæ скъæппытыл æвдисынц, 97-æм рæвдауæндоны бирæ хъомылгæнинæгтæ кæй ис, уый. Ардæм сæ сабиты кæнынц хæстæгдæр уынгты цæрджытæ. Зæгъæм, Магкайы-фырты уынгæй. Уым цæры бирæ æрыгон бинонтæ. Хъомылгæнинæгтæн дзы ис хъæугæ уавæртæ – хъазæн зонæтæ, хицæн хуыссæнуаттæ – хъомылгæнджытæ сæ сæхæдæг саив кодтой, алыхуызон ахуыртæ. Ацы рæвдауæндонмæ цæуын кæй фæнды, уыдон дзæвгар кæй сты, уый тыххæй номхыгъдмæ гæсгæ хъомылгæнинæгты нымæц хуыссæн бынæттæй фылдæр у. 2 цæттæгæнæн къорды ис фæйнæ 37 сабийы, хистæр къордты та – æртыны онг.
Батырты Аслан куыд загъта, афтæмæй уый фæрцы ныр чи кусы, уыцы рæвдауæндæттæ фæуæгъддæр уыдзысты. Уыимæ ма Дзæуджыхъæуы генералон пъланыл кусгæйæ мастер-пъланы хыгъд цæуы ног микрорайонты социалон объектты арæзтад.
Абон республикæйы кусы скъолайы агъоммæйы 250 ахуырадон организацийы – паддзахадонтæ, муниципалонтæ æмæ сæрмагондтæ. Сæрмагонд рæвдауæндæттæ сты 10. Уыдонæй 3 архайынц программæ «Демографи»-йы. Уый та нысан кæны, афæдз æмæ рдæгæй 3 азы онг кæуыл цæуы, уыцы сывæллæтты ахуырады аргъ у паддзахадон рæвдауæндæтты цас у, уый бæрц.
Специалисттæ куыд зæгъынц, афтæмæй ныртæккæ рæвдауæндæтты комплектаци цæуы фæткæвæрдмæ гæсгæ. Сывæллæтты исынц афæдзы дæргъы, куыддæр бынæттæ суæгъд вæййынц, афтæ.
