Дзæуджыхъæумæ делегацитæ ссыди Ростовы æмæ Волгограды облæсттæй
Зындгонд æфсæддон разамонæг Плиты Иссæйы райгуырдыл сæххæст 118 азы. Дзæуджыхъæумæ делегацитæ ссыди Ростовы æмæ Волгограды облæсттæй. Уазджытыл сæмбæлдысты республикæйы сæрдары хæдивæг Тугъанаты Ларисæ æмæ отставкæйы инæлар-майор Сихъоты Сослан. Плиты Иссæйы цыртдзæвæны къæйдурыл сæвæрдтой дидинджытæ æмæ веноктæ. Национ музейы фонд фыццаг хатт адæмы размæ рахаста Иссæйы царды Монголи цы бынат бацахста, ууыл дзурæг уникалон хуызистытæ. Уый фæстæ бабæрæг кодтой Мады Майрæмы аргъуаны пантеон. Ам та делегаци кад скодта инæлар-майор, æртæ хæсты архайæг Сланты Лентойæн. Уазджытæ куыд загътой, афтæмæй дивизийы командæгæнæг Фыдыбæстæйы Стыр хæсты рæстæг стыр æвæрæн бахаста Донбасс суæгъд кæнынмæ. Æфсæддон нымысы горæт Калач на Дону-йы æвæрд æрцыд Плиты Иссæйы номарæн фæйнæг. Ахæм хъазахъхъæгтæ сластой Советон Цæдисы дыууæ хатты хъæбатыры музеймæ дæр. Уазджытæ бахастой фæндон, цæмæй мемориалон фæйнæг сæвæрой Бæтæхъойы хъæуы. Сланты Лентойы номимæ къæйдур та аласой йæ райгуырæн зæххмæ, Хуссар Ирыстонмæ.
