Хатдзæгтæгæнæн программæйы акæндзысты, хъазахъхъæгтæ балцмæ цæугæйæ цы кафт кодтой, уый
Зындгонд хореограф Стъараполæй Александр Виниченко Республикæйы культурæйы колледжы студенттæн сæвæрдта ног кафт. Хатдзæгтæгæнæн программæйы акæндзысты, хъазахъхъæгтæ балцмæ цæугæйæ цы кафт кодтой, уый. Дæсныйадæвдисæг ахуырты тыххæй бæстондæр радзурдзæн Чехойты Фатимæ.
Уæнгты аив айст, зын техникæ æмæ ансамблы иумæйаг куыст – Республикæйы культурæйы колледжы бацæттæ кодтой ног постановкæ. Зындгонд хореограф Александр Виниченко радон хатт бакуыста студенттимæ. Ахуыргæнæндоны фыццаг хатт равдыстой ног кафт.
Хореограф колледжимæ бирæ азты кæны æмгуыстад. Алы горæттæй æмæ бæстæтæй кæфты дæсныты æрбахонынц, цæмæй студенттæ зонгæ кæной алыхуызон скъолатимæ æмæ хореографийы хуызтимæ.
Александр Виниченко у фæлтæрдджын хореограф. У кафты скъолайы сæргълæууæг, Стъараполы ансамблы аивадон разамонæг. 10 азы размæ студенттæн сæвæрдта кафт “Калинка-лезгинка”. Уыцы постановкæ хаст æрцыд колледжы репертуармæ, ныры онг дæр у концертон программæты хай.
Ног постановкæ – хъазахъхъæгты балцы кафт. Студенттæн ахæм куыст уыд æнахуыр, уымæн æмæ колледжы арæхдæр кусынц кавказаг хореографиимæ. Кафт домы æндæр зондахаст æмæ уæнгты змæлд, стæй аивдæр равдыст, фæбæрæг кодтой студенттæ.
Репетицийы цыдмæ сæ цæст дарынц хуынд специалисттæ. Ахæм равдыстытæ студенттæн свæййынц хорз фадат сæ цæттæдзинад равдисынæн æмæ профессионалон хъуыдытæ базонынæн.
Хъазахъхъаг кафт равдисдзысты 10-æм июны, хатдзæгтæгæнæн концерты. Суыдзæн программæйы хай æмæ фæхъæздыгдæр кæндзæн Республикæйы культурæйы колледжы репертуар. Ныртæккæ ма залы кусынц лыстæг хабæрттыл, цæмæй сценæйы фенæн уа бæстон æмæ аив хореографи.
