Ахæм куыст цæуы паддзахадон профилон программæ æххæст кæнгæйæ
85 бинонтæ ацы аз райстой æвдисæндартæ цæрæнуæттæ самал кæынæн. Ахæм куыст цæуы паддзахадон профилон программæ æххæст кæнгæйæ. Сæрмагондæй арæзт у æрыгон бинонтæн. Уый тыххæй, проект «Хицауадимæ ныхас» æххæст кæнгæйæ, радзырдта Цæгат Ирыстоны арæзтады æмæ архитектурæйы министр Тотыккаты Артур. Куыд фæбæлвырддæр кодта, афтæмæй ам ныхас цæуы, квадратон метрты иумæйаг аргъæн йе 35 процентыл. Æдæппæтæй ныртæккæйы онг рады лæууынц мин адæймагæй фылдæр. Паддзахады æххуысыл сæ зæрдæ дарæн ис , 36 азæй фылдæр кæуыл нæ цæуы, ахæм æрыгон бинонтæн. Ахсджиаг у, цал сывæллоны сын ис, уыцы фарста дæр. Афтæмæй, льготæмæ æнхъæлмæ кæсгæйæ ма бинонты ноджыдæр иу сывæллон куы райгуыры, уæд сæ рад фæраздæр уыдзæн. Уымæй дарддæр ма министр радзырдта, ацы аз арæзтады къабаз зынгæ къахдзæфтæ кæй акодта, уый тыххæй. Пандемия дæр æй нæ бахъыгдардта. Уыимæ канд цæрæн хæдзæртты кой нæ кодта, фæлæ ма социалон объекттыл дæр. Се хсæн – 35 ахуырады объекты, 36 – æнæниздзинадхъахъхъæнынады, 18 – физкультурæ æмæ спорты, стæй ма 17 сты культурæйы объекттæ. Арæзтадон хъæппæристыл кусдзысты дарддæр дæр.
