Уыдон цæттæ сты республикæйæн коронавирусы ныхмæ тох кæныны хъуыддаджы æххуыс кæнынмæ.
Акци «Мах стæм иумæ» сæмбырд кодта 15 æхсæнадон организацийы. Уыдон цæттæ сты республикæйæн коронавирусы ныхмæ тох кæныны хъуыддаджы æххуыс кæнынмæ.
Се хсæн сты скъоладзауты уæрæсейаг змæлды уæнгтæ дæр. Нæ республикæйы сæргълæууæджы амындмæ гæсгæ арæзт æрцыд колл-центр. Йæ сæйраг нысан у, COVID-19-æй йæхи амбулаторон уагæй чи дзæбæх кæны, уыдонимæ ныхас кæнын, æмæ цавæр æххуыс хъуаг сты, уый базонын. Рæстæмбис нымадæй иу бонмæ активисттæ телефонæй бадзурынц 500 адæймагмæ. Колл-центры куысты тыххæй бæстондæр радзурдзæн Фидараты Маринæ.
Уалдзæджы дæр ма, акци «Мах стæм иумæ» æххæст кæнгæйæ, æрыгон чызг æххуыс кодта тагъд æххуысы клиникон рынчындоны. Ныртæккæ та Цæгат Ирыстоны паддзахадон университеты историон факультеты дыккæгæм курсы студенткæ æмæ скъоладзауты змæлды активисткæ Гæмæонты Регинæ разамынд дæтты колл-центрæн. Чи дзы кусы, уыдоны нысан у – коронавирусæй рынчын адæмæн медицинон лæггæдты хæрзхъæддзинад бæрæг кæнын.
Волонтерты фæнды ахадгæ æххуыс кæнын. Уымæ гæсгæ, фиппаинæгтæ сбæрæг кæнгæйæ, æвæстиатæй бавналынц фарстатæ лыг кæнынмæ. Скъоладзауты змæлды регионалон координатор Мæргъиты Жаннæ куыд радзырдта, афтæмæй цы информаци сæмбырд кæнынц, уый арвитынц поликлиникæтæм æмæ сæрмагондæй Битарты Вячеславæн.
Акци æххæст кæнгæйæ ма æххуыс цæуы поликлиникæты дæр. Ам волонтертæ-медиктæ æххуыс кæнынц хистæр æмкусджытæн тестытæ исынæн, стæй æндæр лæггæдтæ кæнынæн дæр. Медицинон академийы студенткæ Къарджиаты Елизаветæ акцийы архайдта пандемияйы райдианæй. Дохтыртæн пациентты дзæбæх кæнын нымайы ахсджиаг æмæ кадджын хъуыддагыл.
Рæхджы сæ куыст сног кæндзысты автоволонтертæ дæр. Уый тыххæй радзырдта Æппæтуæрæсеон адæмон фронты регионалон æххæстгæнæн комитеты разамонæг Гæлиты Клим.
Акци «Мах стæм иумæ» баиу кодта, æппынæдзухдæр æххуысы къух чи бадары, ахæм зæрдæхæлар адæмы.
