Коронавирусы инфекци фæстаг рæстæг кæй парахат кæны, уый специалисттæ бæттынц, адæм санитарон домæнтæ кæй не ххæст кæнынц, уыимæ
Коронавирусы инфекци фæстаг рæстæг кæй парахат кæны, уый специалисттæ бæттынц, адæм санитарон домæнтæ кæй не ххæст кæнынц, уыимæ. Фæлхасадмæ цæстдарды управленийы амынддзинæдтæ ницæмæ даргæйæ, æвзæрын кæнынц тæссаг уавæр сæхицæн æмæ сæ хиуæттæн дæр. Бæрнон ведомствойы кусджытæ рацыдысты радон рейды, æмæ сбæрæг кодтой базарадон центрты уавæр. Семæ уыд нæ уацхæссæг Гæджиты Сослан дæр, æмæ йын ныхасы бар.
Дзæуджыхъæуы Московскийы уынджы базарадон центртæ цæттæ сты коронавирусы ныхмæ тох кæнынмæ. Бацæуæны æмæ кассæты цур ис антисептиктæ, маскæтæ, стæй социалон дистанци æххæст кæнынæн хæххытæ. Фæлхасадмæ цæстдарды управленийы специалисттæ лæмбынæг бæрæг кæнынц алы хъуыддæгтæ дæр.
Фæлхасгæнджытæн базарадон центры байуарынц маскæтæ æмæ сæ къухтæн скæнынц дезинфекци.
Фæлæ уæддæр æмбæлынц, санитарон домæнтæ æххæст кæнын æнæмæнг хъуыддагыл чи нæ нымайы, ахæм адæм дæр. Фæлхасадмæ цæстдарды управленийы кусджытæ се ппæты зæрдыл лæууын кæнынц, ныртæккæ уæлдай ахсджиаг кæй у профилактон мадзæлттæ æххæст кæнын, адæмæн сæхи æмæ сæ хæстæджыты æнæниздзинадыл хъуыды кæнын.
Къесаты Астаны уынджы базарадон центры кусджытæм та фæлхасадмæ цæстдарды управленийы специалисттæ æрхастой фиппаинæгтæ. Бæлвырддæр та уый тыххæй, æмæ цалдæр хойрæгты дуканийы уæйгæнджытæ фæлхасгæнджытæн лæггад кодтой æнæ маскæтæй.
Фæлхасадмæ цæстдарды управленийы кусджытæ ма иу хатт се ппæты зæрдыл æрлæууын кодтой – адæм профилактикон мадзæлттæ куы ницмæмæ дарой, уæд тæссаг у низ парахат кæнынæй. Уæйгæнджытæ æмæ администратортæ уал баййæфтой дзырдæй æфхæрд. Фæлæ дарддæр уавæр куы нæ аива, уæд æфхæрд уыдзæн карздæр.
Куыд ма уын æй хъусын кодтам, афтæмæй фæстаг бонты ацы хæцгæ низ кæны парахатдæр, уымæ гæсгæ ахæм рейдтæ арæзт цæудзысты арæхдæр.
