Цæрæгойты авиатранспортæй сласдзысты Сочийы национ парчы Кавказы леопардтæ сног кæныны Центрæй
Дыууæ кавказаг леопарды абон рауадздзысты Цæгат Ирыстоны хъæддаг æрдзмæ. Нæ республикæйы экологийы æмæ æрдзон æвæрæнты министрады пресс-службæ куыд фехъусын кодта, афтæмæй цæрæгойты авиатранспортæй сласдзысты Сочийы национ парчы Кавказы леопардтæ сног кæныны Центрæй. Уæрæсейы наукæты академийы экологийы æмæ эволюцийы фарстаты фæдыл Институты специалисттæ сæрмагондæй Ирыстонæн леопардты равзæрстой хицæн генетикон аууæлтæм гæсгæ.
Нæ республикæйы цæрджытæ равдыстой сæ фæндон, цæмæй леопардтæн радтой Нарты кадджытæй ист нæмттæ – Батрадз æмæ Агуындæ. Уыдон нысан кæнынц хъæбатырдзинад æмæ рæсугъддзинад. Уæ зæрдыл уын æрлæууын кæндзыстæм, раззагазиаг леопардтæ Эльбрус æмæ Волнайы Цæгат Ирыстоны хъæддаг æрдзмæ ауагътой дыууæ азы размæ.