Фатертæй иуы хицау сарæзта ныхмæлæуддзинады акци
Джыккайты Шамилы уынджы ног хæдзары афæдз æмæ рдæг нæй газ
Фатер ис, фæлæ дзы цæрæн нæй. Джыккайты Шамилы уынджы хæдзары цæрджытæн æндæр гæнæн нæй, æмæ зымæг æрвитынц сæ хæстæджытæм. Уымæн æмæ хæдзары афæдз æмæ рдæг нæй газ. Фатертæй иуы хицау сарæзта ныхмæлæуддзинады акци. Йæ хъæстытæ алыхуызон бæрнон куыстуæттæм ницы дзуапп радтой. Цæмæн афтæ рауад, æмæ куыд баххуыс кæнæн ис цæрджытæн, уый тыххæй радзурдзæн Фидараты Маринæ.
Пагæты Таисия цæры Джыккайты Шамилы уынджы 4 «А», хæдзары. Фатер ис, фæлæ дзы цæрæн нæй. Уæвгæ, хæдзары цæрджытæн æндæр гæнæн нæй, æмæ зымæг æрвитынц сæ хæстæджытæм. Уымæн æмæ сæм афæдз æмæ рдæг нæй газ. Таисия сфæнд кодта ныхмæлæуддзинады акци саразын. Уымæн æмæ йæ хъæстытæ алыхуызон бæрнон куыстуæттæм ницы дзуапп радтой. Уæд сылгоймаг ныффыста плакат, æмæ рбацыд хицауады хæдзары цурмæ.
Таисияйы бирæ лæууын нæ бахъуыди. Æвæстиатæй йæм бадзырдтой. Æмæ йын ныффыссын кодтой курдиат республикæйы сæргълæууæг Битарты Вячеславы номыл. Ныр сылгоймагмæ ныфс фæзынд. Уымæн æмæ нæ подрядон организаци, нæ газуарæг компани ныры онг уавæр аивынæн ницы бакодтой.
Газы хызæг хъуамæ сæвæрдтаид подрядон организаци, уый та нымад æрцыд банкротыл, æмæ сын уыцы куыст бакæнын нæ бантыст. Газуарæг компанимæ фарста алыг кæнынæн ис йæхи хъуыдытæ. Фæлæ уымæн та хъæуы дыууæ фарсы разыдзинад дæр.
Ног азы бæрæгбоныл сæмбæлынмæ ма хъавыдысты 135 бинонтæ. Уыйбæрц фатертæ ис бæстыхайы. Райдыдтой цалцæг кæнын, фæлæ йæ кæронмæ ахæццæ кæнынæн фадат нæй.
Бирæтæ ног цæрæнуæттæ райстой ипотекæйæ, мадæлон капиталæй спайда кæнгæйæ. Ныртæккæ та сын æндæр гæнæн нæй, æмæ цæрынц æххуырст фатерты.
Уыимæ ма фатертæ уæй кæныны размæ, объект эксплуатацийæн бар радтой Дзæуджыхъæуы администрацийы. Уый фæстæ сбæрæг сты бæлвырддзинæдтæ.
Уавæр кæд аивдзæн, ууыл Джыккайты Шамилы 4″А» хæдзары цæрджытæ тынг тыхсынц. Сæйрагдæр сын у, закъонмæ гæсгæ кæй балхæдтой, уыцы фатерты тагъддæр æрцæрын. Уыимæ – æппæт æмбæлгæ инфраструктурæимæ.
