Специалисттæ куыд зæгъынц, афтæмæй барады чи кусы, уыдон хъуамæ цæстдарджытæм ма æнхъæлмæ кæсой, фæлæ рагацау батыхсой фæлхасгæнджыты æнæниздзинадыл
Вирусы ныхмæ тох кæнын хъæуы алыхуызон мадзæлттæй. Дезинфекцион фæрæзтæ та хъуамæ уой алкæмæ дæр. Уый хорз зонынц базарадон центрты æмæ дуканиты кусджытæ. Фæлæ се ппæт дæр уыцы домæнтæ æххæст кæнынц, æви ис фæткхалджытæ дæр? Радон хатт уый сбæрæг кæныны тыххæй рейды рацыдысты фæлхасадмæ цæстдарды управленийы специалисттæ.
Ацы егъау базарадон дуканийы Уæрæсейы фæлхасады минæвæрттæ фыццаг хатт не сты. Уый размæ йæ разамындæн бахæс кодтой, цæмæй сæвæрой уæлдæф сыгъдæггæнæн кусæнгæрзтæ. Къуырийы фæстæ сæ домæн æххæстгонд æрцыд.
Ахæм хæс æвæрд æрцыд базар «Алан»-ы разамынды цур дæр. Стыр бæстыхайы та хъæуы цалдæр кусæнгарзы сифтонг кæнын, уымæ гæсгæ сæ нырма нæ самал кодтой. Фæлæ базары разамынд зæрдæ æвæры, цалдæр боны мгъуыдмæ фарста лыггонд кæй уыдзæн, уымæй.
Уый размæ цалдæр базаргæнæн раны нæй санитарон куыстытæ кæм хыгъд цыдысты, ахæм журнал, стæй нæ барстой буары тæвд. Ныр та зæгъæм ацы куыстуаты ис журнал дæр, стæй æххæст кæнынц фæлхасадмæ цæстдарды домæнтæ.
Фæлæ æппæт базарадон кусджытæ нæ сæххæст кодтой эпидемиологон домæнтæ. Зæгъæм мæнæ ацы дукани у хъазæнтæ уæйгæнæн дукани. Уæйгæнджытæ нæ дарынц маскæтæ, нæй сæм уæлдæф сыгъдæггæнæнтæ дæр. Фæлхасадон цæстдарды кусджытæ ныр фæкарздæр кæндзысты сæ домæнтæ.
Специалисттæ куыд зæгъынц, афтæмæй барады чи кусы, уыдон хъуамæ цæстдарджытæм ма æнхъæлмæ кæсой, фæлæ рагацау батыхсой фæлхасгæнджыты æнæниздзинадыл. Куы нæ сæ æххæст кæной, уæд та сæ бахъæудзæн ивар бафидын, кæнæ та сын сæ куыст бауромдзысты.
