Ныр та уал жюрийы уæнгтæ архайынц хуыздæртæй хуыздæры равзарыныл
Хуыздæр хи хæдзарады конкурсы хатдзæгтæ бæрæггонд æрцæудзысты хæстæгдæр цалдæр бонты. Ныр та уал жюрийы уæнгтæ архайынц хуыздæртæй хуыздæры равзарыныл. Æрыдоны район рагæйдæр хъуыстгонд уыди йæ куыстуарзон адæмæй. Районы æмвæзады конкурсы уæлахиздзаутæ чи сси, уыдоны хсæн Нартыхты бинонтæ дæр. Сæ кæртмæ бахизгæйæ адæймаджы зæрдæ райы, къухвæллой кæм зыны, уыцы аив хæдзарадæй. Æвдисæн ын уыди не сфæлдыстадон къорд дæр.
Аив зайæгойтæ, рæсугъд къахвæндæгтæ, æфснайд кæркдæттæ. Цæмæй сæ кæртæй аив æмæ цæстæн æхсызгон бынат саразой, уый тыххæй Нартыхты бинонтæ иу æмæ дыууæ азы нæ бахъуыди.
Æрыдоны районы хуыздæр хи хæдзарады конкурсы жюрийы уæнгæ æппæты фыццаг сæ цæст фæдарынц, хæдзарадæн йæ хицæутты дарын йæ бон у, æви нæ, уымæ. Конкурсантты фылдæр хаймæ уыимæ къуылымпыдзинæдтæ нæ вæййы. Ам ис дыргъдæттæ, цæхæрадæттæ, хæдзарон фос, мæргътæ.
Хъыгагæн фæззæджы астæу хæдзарад йæ тæккæ тæмæны нæ баййафдзынæ. Бирæ зайæгойтæ дзы сæ афонмæ гæсгæ бахус сты. Фæлæ, уый жюри æмбары. Хорз æмæ зылд, адæймаджы къухвæллой кæм зыны, ахæм хæдзарад зымæджы дæр раиртасдзынæ.
Ныртæккæ та цæуы конкурсы районы къæпхæн. Архайынц дзы, амæй размæйы æмвæзадыл хсæн чи фæуæлахиз, уыдон. Районты сæргълæуджытæй райстой лæвæрттæ. Æрыдоны районы сæргълæууæг Тотраты Владиславы ныхæстæм гæсгæ, ахæм конкурстæ районты цæрджыты кæнынц разæнгард. Базилынц сæ кæртытæм, уыдон та сын пайда фæхæссынц. Уый иу, иуварсырдыгæй чи бакæсы, уымæн та йæ цæст фæрайы.
Конкурсы уæлахиздзауты жюрийы уæнгтæ сбæрæг кæндзысты хæстæгдæр цалдæр боны. Хуыздæртæй хуыздæр чи разына, уый хорзæхгонд æрцæудзæни æхцайы призæй, конкурсант сæ спайда кæндзæн зæрдæйы фæндонмæ гæсгæ.
