Уый фæрцы ног дæсныйæдтыл сахуыр кодтой сæдæгай адæймæгтæ
Адæймаг цыфæнды кары дæр хъуамæ тырна ногдзинæдтæ базонынмæ. Уымæн та фадæттæ кæдфæндыдæр вæййынц. Зæгъæм, нæ республикæйы æнтыстджынæй æххæстгонд цæуы пенсиисджыты æмæ пенсийы ацæуыны агъоммæ кары адæмæн ахуырадон программæ. Уый фæрцы ног дæсныйæдтыл сахуыр кодтой сæдæгай адæймæгтæ. Моргуаты Ладæ радзурдзæн бæлвырддæр.
Ацы цæхæрадоны алцы дæр у хи къухтæй конд, уæвгæ йæ хæдзары дæр бæрæг дары йæ æрмдзæф. 70 – аздзыд Гæззаты Шотамæ ис хорз фæлтæрддзинад. Хъæдæрмæджы куыст кæныны размæ уыд амайæг. Фæлæ пенсийы куы рацыд, уæд дуры куыст баивта хъæдæрмæгыл. Уалдзæджы та ма партæйы уæлхъус дæр æрбадт. Ацæргæ адæмæн сæ зонындзинæдтыл ахуыргæнæндоны кæй æфтауынц, уый базыдта йæ зонгæтæй. Æмæ сфæнд кодта национ проект «Демографи»-йы фæлгæты программæ 50+ архайын.
Пенсиисджыты æмæ пенсийы агъоммæ адæмæн программæ дыккаг аз царды æххæстгонд Цæгат Кавказы аграрон-технологон колледжы бындурыл. 2019-æм азы дзы профилон зонындзинæдтæ райстой 645 ацæргæ адæймаджы. 2020-æм азы нысан кæнынц рауадзын 376 адæймаджы. Æдæппæтæй дзы ис 12 хуызы.
Программæйы архайыны фадат ис се ппæтæн дæр. Ам сахуыр кæндзысты уæливыхтæ фыцын æмæ аразтадон уæзæгтæ исæн къраныл кусын. Æмтгæй ахуырадон программæ арæзт у 2 къуырийæ 2 мæйы æмæ æрдæджы онг. Уый фæстæ æнæмæнг раттын хъæуы фæлварæн.
Хъæдæрмæджы куыстгæнæг Гæззаты Шота ныр фæуæрæхдæр кодта, хи фæллойы руаджы чи цæры, уыдоны рæнхъытæ. Аразы цæлгæнæны мигæнæнтæ, суанг ма музыкалон инструменттæ – дала-фæндыр. Ныртæккæ та бавнæлдта сынтæг саразынмæ. Куыд зæгъы, афтæмæй йæ ног зонындзинæдтæ бахъуыдысты. Шотайы хуызæн ног зонындзинæдтæм чи тырны, уыцы ацæргæ адæмæн сентябры скъола ногæй байгом кæндзæн йæ дуæрттæ. Стыр бинонты хистæр та – ис ын 8 хъæбулы, цоты цот – йæ тырнындзинадæй æмæ фæллойæ рæсугъд æнкъарæнтæ лæвар кæны йæ алфамбылай чи ис, уыдонæн. Афтæ Шота хъуддагæй æвдисы – зæрдæмæдзæугæ дæсныйад райсынæн азтæ цæлхдур кæй не сты, уый.
