Профилон ведомствæйы æмæ пъæлицæйы кусджытæ аразынц рейдтæ, æнæзакъонæй кæм ис акалæн нæзы бæлæстæ, уыцы бынæтты.
Ног азы агъоммæ республикæйы экологийы æмæ æрдзон æвæрæнты министрад фæкарздæр кодта, нæзы бæлæстæ кæм рæзынц, уыцы хъæдтæм цæстдард. Профилон ведомствæйы æмæ пъæлицæйы кусджытæ аразынц рейдтæ, æнæзакъонæй кæм ис акалæн нæзы бæлæстæ, уыцы бынæтты. Специалисттæ хъахъхъæнынц карз фæткмæ гæсгæ. Æхсæвæй – бонæй Алагиры, Дзæуджыхъæуы, Æрæфы, Кировы æмæ Мæздæджы районты хъæдты зилдзысты патрулон службæтæ. Æнæ æмбæлгæ гæххæттæй нæзы бæлæстæ калгæ кæй æрцахсой, уыдоныл арæзт цæудзæн протокол. Уæвгæ ахæм фыдмигæнджытæ æфхæрд æййафдзысты æдминистративон æгъдауæй, стæй иваргонд цæудзысты 4 мин сомæй 300 мин сомы онг. Уголовон хъуыддаг та йыл арæзт æрцæудзæн 5 мин сомæй фылдæр æрдзæн зиан куы æрхæсса, уæд.
