Уыцы фарстатыл æрныхас кодтой республикæйы хицауады æмбырды.
Цæгат Ирыстоны бизнес-æхсæнады минæврæттæ баххуыс кæндзысты скъолатæн æмæ сывæллæтты рæвдауæндæттæн. Уыцы фарстатыл æрныхас кодтой республикæйы хицауады æмбырды. Нырæй фæстæмæ ахуыргæнæндæттæ уыдзысты амалхъом адæмы бæрны, æмæ сын уыдон кæндзысты алывæрсыг æххуыс. Уый фæрцы зынгæ фæхуыздæр уыдзысты ахуырадон объектты уавæртæ, æмæ дзуапп дæтдзысты нырыккон домæнтæн. Цавæр æххуыс бакодтой ныридæгæн, уый тыххæй радзурдзæн Дудиаты Джинæ.
Дзгойты Хъазыбег у Дзæуджыхъæуы æртынæм скъолайы рауагъдон. Ныртæккæ та йе фсымæр Георгиимæ кусы егъау арæзтадон компанийы. Сæ уарзон скъола нæ рох кæнынц – уый иу, фæлæ ма кæнынц æххуыс дæр. Зæгъæм, ацы хатт фæнд кæнынц ног спортивон зал саразын. Хъазыбег куыд зæгъы, афтæмæй зæронд зал дзуапп нал дæтты нырыккон домæнтæн.
Иннæ амалхъом адæмы хуызæн Дзгойты Хъазыбег æмæ Георгий рахæцыдысты республикæйы хъæппæрисы фарс, ома ахуыргæнæдæттæ бизнесменты бæрны райсыны тыххæй.
Ныртæккæ Цæгат Ирыстоны арæзт цæуы бæрнон амалхъом, æмæ социалон æгъдауæй активон адæмы реестр саразыны куыст. Бирæтæ ныридæгæн сæхи равыдстой. Сарæзтой æмæ эксплуатацийы радтой цалдæр социалон-культурон объекты.
Æххуысхъуаг чи у, ахæм ахуырадон объекттæ нæ республикæйы чысыл нæй. Уымæ гæсгæ амалхъом адæмæн сæ бон у равзарын. Бæлвырддæр та – цавæр скъолатæн æмæ сывæллæтты рæвдауæндæттæн æххуыс кæндзысты, уый.
