Се ппæты дæр цæуынц арæзтадон, кæнæ рацарæзты æмæ бындурон цалцæггæнæн куыстытæ
Алагиры скъола, Суададжы культурæйы хæдзар, Цыколайы поликлиникæ. Тускъаты Таймураз та радон хатт, кусæг балцы уæвгæйæ, бабæрæг кодта республикæйы, социалон æгъдауæй ахсджиаг объекттæ. Се ппæты дæр цæуынц арæзтадон, кæнæ рацарæзты æмæ бындурон цалцæггæнæн куыстытæ. Уыимæ – нысанмæ арæзт программæтæ æххæст кæнгæйæ. Хицауады сæрдары хæстæ рæстæгмæ æххæстгæнæг рæстæгæй-рæстæгмæ æркæсы куыстыты хæрзхъæддзинадмæ.
60 азмæ фыццаг хатт Алагиры аивæдты скъолайы райдыдтой цалцæггæнæн куыстытæ кæнын. Ныридæгæн баивтой бæстыхайы сæр, баззади ма дзы мидæггаг куыстытæ. Ахуыргæнæн музыкалон кълæстæ цалцæджы рæстæг аразджытæ пайда кæндзысты аккустикон панельтæй. Дуæрттæ æмæ радзугуытæ дæр баивдзысты, æмæ спайда кæндзысты нырыккон æрмæгæй. Объект эксплуатацийы раттынмæ хъавынц августы кæрон. Уымæ гæсгæ ахуыры аз райдайдзæн афоныл. Базилдзысты алфамбылай территоримæ дæр.
Суададжы бындуронæй цалцæг кæнынц культурæйы Хæдзар. 25 азмæ бæстыхай сси бæстонæй базилинаг. Рацарæзтмæ бавнæлдтой февралы. Ныры онг бавитой бæстыхайы сæр, хъармгæнæн системæ, дуæрттæ æмæ рудзгуытæ. Ныртæккæ цалцæг кæнынц сценæ. Подрядон организацийы куыд зæгъынц, афтæмæй, раздæрау, фарстатæ æвзæрынц сметæйы хъуыддаджы. Тускъаты Таймураз бабæрæг кодта Рæмонтыхъæу дæр. Алагиры районы ма рæхджы фæзындзæн ноджыдæр иу фельдшерон-акушерон пункт. Сæврдтой уал ын бындур. Алывæрсыг æххуысæн дзы уыдзæн æппæт гæнæнтæ.
Таймураз инспекцион балцы уыд Цыколайы Уæлахизы Парчы дæр. Ам сæвæрдтой дизайнерон бандæттæ, рухсгæнæнтæ. Фистæгæйцæуджыты зонæйы иу хайы сæвæрдтой асфальт. Парчы территорийы фæзынд Советон Цæдисы хъæбатыр Махъоты Алиханы мемориалон бюст. Цыколайы ма дарддæр рацарæзт цæуы бынæттон поликлиникæйы. Ивгъуыд æнусы 80-йæм азтæй фæстæмæ медицинон куыстуат цалцæггонд нæ цыд. Ныртæккæ та куыстытæ бацыдысты сæ тæмæны. Электрон тыхдæттæг телтæ рацарæзтой. Дарддæр рады лæууы бæстыхайы сæр. Поликлиникæйы фæзындзæн гериатры кабинет. Ацæргæ пациенттæ дзы исдзысты æмбæлгæ æххуыс.
Кусæг балцы рæстæг ма Тускъаты Таймураз бабæрæг кодта цалдæр объекты. Бындуронæй цалцæг кæнынц Сырх-Дыгуры фæлладуадзæн парк. Æхсæнадон территорийæн бындур æвæрд æрцыд 1948-æм азы. Ног парк фæзындзæн Цыколайы дæр.
