Ацы хатт бабæрæг кодтой музейтæ, библиотекæтæ æмæ базарадон центртæ
Æдасдзинад – æппæтæй сæйрагдæр. Уæрæсейы фæлхасадмæ цæстдарды цæгатирыстойнаг Управленийы специалисттæ æмæ мидхъуыддæгты министрады кусджытæ рацыдысты радон рейды. Ацы хатт бабæрæг кодтой музейтæ, библиотекæтæ æмæ базарадон центртæ. Инфекци парахат кæнын куы райдыдта, уæдæй фæстæмæ йæ ныхмæ домæнтæ нæ аивтой. Уыимæ ма хъуамæ адæмы хсæн бындуронæй ныффидар уыдаиккой. Фæлæ специалисттæ куыд зæгъынц, афтæмæй рæстæгæй-рæстæгмæ сбæрæг кæнынц аиппытæ. Тох кæнынц фæткхалджытимæ. Ацы бонты базарадон центр «Столицæ»-йы сæхгæдтой кинотеатр æмæ сывæллæтты ирхæфсæн фæз. Бæлвырддæр хабæрттæ радзурдзæн Хæуытаты Зитæ.
Дæргъæвсы некрополы экспозицийы цур æрлæугæйæ адæймагмæ уæлдай æрхæндæг æнкъарæнтæ фæзыны. Абоны уавæр хынцгæйæ, дард ивгъуыды цаутæ уæлдай хæстæгдæр сты. Ахæм дзæппæзты сæ царды фæстаг бонтæ æрвыстой, 18-æм æнусы рын кæуыл бахæцыд, уыдон. Музейы амонæджы ныхæстæм байхъуысгæйæ иннæ залмæ рахизгæйæ дæр æрбацæуджытæ сæ маскæтæ нал раласынц. 21-æм æнусы рын – коронавирус кæй хонынц, дæр цардæн тæссаг у. Нæ республикæйы национ музей кусы, фæлæ иугай адæмæн, экскурситæ ныртæккæ арæх нæ вæййы. Уыцы-иу рæстæг, иу залы уæвæн ис æрмæтсдæр 5 адæймагæн.
Уæрæсейы фæлхасадмæ цæстдарды цæгатирыстойнаг Управленийы домæнтæ хъуамæ æххæст кæной алы организациты разамонджытæ, кæд сын се рвылбоны куыст цæвæрдæр æгъдауæй къуылымпы кæнынц, уæддæр. Ацы уавæрты æнцон кусæн нæу национ наукон библиотекæйæн дæр. Ам дæр ныртæккæ стæм адæймаджы уадзынц, уæлдайдæр та литературон æмæ равдыстадон хайæдтæм.
Уæрæсейы фæлдахасдон цæдисы æмæ мидхъуыддæгты министрады куыджытæ æрвылбон сæ цæст дарынц эпидемиологон уавæрмæ. Домæнтæ чи не ххæст кæны, уыдон дзуапп дæтдзысты административон æгъдауæй. Бонæй бонмæ сæ домæнтæ сты карздæр. Радон рейды базарадон центр » Столицæ»-йы рабæрæг кодтой закъонхæлдтытæ.
Æхгæд дзы æрцыдысты æрмæст алыхуызон ирхæфсæн мадзæлттæ нæ, фæлæ ма суанг кассæтæ дæр. Уымæй уæлдай ма, бæрнон ведомствоты уынаффæмæ гæсгæ, æрлæууыд кинотеатр æмæ йæм йæ бахизæнмæ цы эскалатортæ арæзт сты, уыдоны куыст дæр. Уыцы рæстæгма ма дзы аивадуарзджытæй чи уыд, уыдон ракуырдтой, цæмæй суæгъд кæной бæстыхай. Ныртæккæ нæ уæй кæнынц билæттæ. Интернеты руаджы цы билеттæ лхæд рцыдысты, уыцы адæмæн та се хца фæстæмæ ратдзысты.
Рейд куыд равдыста, уымæ гæсгæ, анæниздзинад бахъахъхъæныны домæнтæ се ппæт не ххæст кæнынц сæхæдæг æрбацæуæг адæм дæр.
Хи ирхæфсæн мадзæлттæ бонæй-бонмæ къаддæргæнгæ цæуынц, фæлæ не ппæт дæр æдасдзинады домæнтæ куы не ххæст кæнæм, æмæ нæхи куы нæ хъахъхъæнæм, уæд сæ уæвгæ дæр фæцух уыдзыстæм.
