Уыцы мадзæлттæ баст сты, Китайы цы эпидемиологон уавæр ис, уыимæ
Уæрæсейы фæлхасадмæ цæстдарды цæгатирыстойнаг хайад паддзахадон арæны сæрты уадзæн пунктты фæкарздæр кодта санитарон цæстдард.
Уыцы мадзæлттæ баст сты, Китайы цы эпидемиологон уавæр ис, уыимæ. Уым æрæджы фæзынд, дохтырты бон басæттын кæй нæу, ахæм ног коронавирус. Цæстдарæн пунктты, бæлццæттæ фылдæр рæстæг цы бынæтты æрвитынц, уым уæлдай лæмбынæгдæр аразынц дезинфекцийы мадзæлттæ. Уымæй уæлдай дзы равæрдтой зæрдылдарæнтæ, хи инфекцийæ куыд бахъахъхъæнæн ис, уый тыххæй. Ныртæккæ уал æнæниздзинадхъахъхъæнынады министрады сфидар кодтой, коронавирусæй кæуыл фæдызæрдыг уой, уыцы адæмæн фыццаградон лабораторон диагностикæйы фæтк. Сæрмагонд ахуыртæ ацыдысты лабораториты кусджытæ æмæ дохтыртæ. Медицинон куыстуæттæ та цæттæ сты, пневмонийы алы хуызтæ кæмæ раиртæстой, уыцы адæм райсынмæ. Ведомство куыд хъусын кæны, афтæмæй оперативон мониторинг куыд сбæрæг кодта, афтæмæй пневмонийы алы хуызтæй рынчын адæмы нымæц нæ фæфылдæр.
