Ацы бонты та не сфæлдыстадон къорд бабæрæг кодта Дзæуджыхъæуы хæринаггæнæн комбинат
Уæвгæ, Беслæны рæвдауæндоны сæвзæрд уавæры фæстæ, стыр æргом аздæхтой республикæйы æппæт ахуыргæнæндæттæм дæр. Ацы бонты та не сфæлдыстадон къорд бабæрæг кодта Дзæуджыхъæуы хæринаггæнæн комбинат. Куыстуаты ног разамынд цы хæстæ сæвæрдта йæ размæ, уый тыххæй радзурдзæн Бокоты Виктория.
Изæрырдæм скъолатæн хæринаггæнæн комбинаты куыст йæ тæмæны бацæуы. Райсомæй раджы æппæт хойрæгтæ баласдзысты Дзæуджыхъæуы скъолатæм æмæ рæвдауæндæттæм. Зын бауырнæн у, фæлæ ма æрæджы ацы куыстуатæн хъуамæ йæ куыст æрлæууыдаид. Ныртæккæ та йæ ног разамынды фæрцы скуыста ног тыхтæй. Стыр æргом здахынц хойрæгты хæрзхъæддзинадмæ.
Бынæттон куыстуæттимæ кæй кусынц, уый комбинатæн фадат дæтты фæрæзтæ фæстауæрц кæнынæн. Къаддæр æхца хардз кæнынц транспорты лæггæдтæн дæр. Комбинаты ног разамынд йæ размæ сæвæрдта ахсджиаг хæс. Æппæт хойрæгтæ хъуамæ уой хæрзхъæд, стæй æнæ уæлдай хъацæнтæй. Афтæмæй фæнд кæнынц сæ хæстæ сæхгæнын, æмæ ма æфтиаг райсын дæр.
Ныртæккæ коллектив кусы хойрæгты нымæц фæфылдæр кæныныл. Уый дæр фадат ратдзæн зын финансон уавæрæй рацæуынæн, зæгъынц куыстуаты разамонджытæ.
