Ацы хатт Уæрæсейы разамонæджы тезистыл Æппæтуæрæсеон адæмон фронты фæзы æрдзырдтой æхсæнады кусджытæ, регионалон хицаудзинады æмæ æнæкоммерцион организациты минæвæрттæ
Бæстæйы президент Владимир Путин федералон æмбырдмæ цы ныстуанимæ фæсидтис, ууыл дарддæр ныхас æмæ куыст цæуы алы æмвæзадтыл. Ацы хатт Уæрæсейы разамонæджы тезистыл Æппæтуæрæсеон адæмон фронты фæзы æрдзырдтой æхсæнады кусджытæ, регионалон хицаудзинады æмæ æнæкоммерцион организациты минæвæрттæ. Æмбырд арæзт æрцыди æртæ къабазмæ гæсгæ: бинонтæн æххуыс, ахуырад æмæ æнæниздзинадхъахъхъæнынад. Ахуырады фарстаты фæдыл дзургæйæ, ныхас цыди кълæсты разамонджытæн уæлæмхасæн фиддонтыл, уæлдæр ахуыргæнæндæтты бюджетон бынæттæ фæфылдæр кæныныл, аивæдты скъолаты æмæ культурæйы хæдзæртты цалцæгыл, ахуырадон процесс нымæцонмæ раивыныл æмæ æндæр хъуыддæгтыл.
Æнæниздзинадхъахъхъæнынады фæдыл æмбырды та бæстонæй дзырдтой медицинон куыстуæтты кусæнгæрзтæй æмæ хостæй ифтонг кæныныл. Уый иу, иннæ ахсджиаг хъуыддаг та, хъæуты амбулаториты дохтыртæ кæй нæ фаг кæны, уый, стæй дохтырты куысты мызды ног системæйыл.
