Экспозици æрбынат кодта паддзахадон музей-фæдзæхст бынат «Царицыно»-йы
Ирон мифологи, нартæ, зæдтæ, фыййæуттæ æмæ барджытæ. Ирыстойнаг нывгæнæг Соскъиты Владимиры куыстыты равдыст ацы бонты фенæн ис Мæскуыйы. Экспозици æрбынат кодта паддзахадон музей-фæдзæхст бынат «Царицыно»-йы. Равдыст баст у мастеры 80 азы юбилейимæ, æмæ йæм хаст æрцыдысты йе сфæлдыстады алы азты конд скульптурæтæ. Бæлвырддæр хабæрттæ радзурдзæн Гуытъиаты Алинæ.
Æхсæз уæзласæн машинæйы æрбаластой равдысты экспонаттæ бронзæйæ, хъæдæрмæгæй, керамиекæйæ — æдæппæтæй 70 куысты. Уыдон равæрдтой æхсæз егъау залы. Се хсæн куыд ивгъуыд азты, афтæ æрæджы кæй фæцис, ахæм куыстытæ дæр. Мадзал саразыны хъæппæрис загътой Царицынойы музейы разамынд. Семæ сразы ис юбиляр дæр. Экспозици «Соскъиты Владимиры Скульптурæ» байгом кодтой æрмдæсныйы æстай азы кадæн.
1990 азы дæрдтыл айхъуыст Соскъиты Владимиры ном. Уæд райста фыццаг премитæ æппæтадæмон равдыстыты, равæрдта фыццаг экспозици Парижы, Франци æмæ Швейцарийы та фæзындысты йе сконд фыццаг монументалон композицитæ. Соскъиты Владимир райдыдта классикæйы кусын æмæ фæстæдæр рахызтис йæхи, æмбал кæмæн нæй, ахæм стильмæ. Йе сфæлдыстадон тавæг та исы ирон культурæ æмæ мифологийæ.
Равдысты архайдтой нæ республикæйы æххæстбарджын минæвар Дзанайты Барис, Цæгат Ирыстоны Парламенты Сæрдары хæдивæг Тотоонты Алыксандр, Мæскуыйы ирон æхсæнады Советы сæрдар Абайты Алан, культурæйы архайджытæ, æхсæнады минæвæрттæ стæй нывгæнæджы хæлæрттæ æмæ хæстæджытæ.
Ног экспозицийæн цы куыстытæ равзæрста, уыдонæй Соскъиты Владимир аивадуарзджытæн ногæй раргом кодта йе сфæлдыстадон фæндаг æмæ йæ миддуне. Ис дзы Нарты Кадджыты хъæбатыртæ, зæдтæ æмæ дауджытæ, фыййæуттæ, стæй адæмы æнцойдзинадхъахъхъæнæг сау барджытæ.
Мадзалмæ стыр æвæрæн бахастой Мæскуыйы ирон æхсæнады уæнгтæ. Хъæрджынты Иринæ, Дзабиаты Эльбрус æмæ Улыбиаты Хъазыбег сæрмагондæй равдыстмæ систой киноныв «Владимир Соскиев. Дорога к себе». Йæ премьерæ уыдис уыцы бон музейы. Равдыст ахæдзæнис 11-æм июньмæ.
