Хор тауыны кампани цæуы нысантæм гæсгæ
Дыгуры районы сæ тæмæны бацыдысты уалдзыгон-быдырон куыстытæ. Хор тауыны кампани цæуы нысантæм гæсгæ. Уыимæ ацы аз аграрон кусджытæ сæ зæрдæ дарынц хъæздыг тыллæг сисыныл. Хорз боныхъæдæй дарддæр та ма сын æххуысгæнæг у сæрмагонд нырыккон техникæ. Районы фæзынди ацы сезоны райдиан.
Боныхъæд фылдæр хус кæй у ныртæккæ, уый нæ бахъыгдардта Дыгуры районы уалдзыгон-быдырон куыстытæ. Райсомæй раджы хъæууонхæдзарадон быдыртæм рацæуынц механизатортæ, агрономтæ æмæ хуымæтæг фæллойгæнджытæ. Иууылдæр иумæ архайынц, цæмæй фæззæджы хъæздыг тыллæг сисой, ууыл.
Зæгъын хъæуы уый, æмæ Дыгуры районы нартхор у быдырты паддзах. 15 мин гектарæй – 14 сты нартхоры фæзтæ. Фæлæ канд уымæй сæ бон нæу раппæлын районы хъæууон хæдзарады кусджытæн.
Уымæй дарддæр ма Дыгуры районы æрзайын кæнынц сойæ. Байтыдтой йæ 200 гектарыл. Нырыккон техникæйы фæрцы быдыртæ бакусын зынгæ æнцондæр фæци. Зæгъæм, районы фæзынд нырыккон хъомысджын трактор. Ифтонггонд у компьютерæй æмæ зын электроникæйæ. Сæ фæрцы цæуынц рагагъоммæ тауæн куыстытæ. Ацы хъæууонхæдзарадон техникæ фыццаг бакастæй æнцон тæрæн у, фæлæ дзы æнæмæнг хъæугæ у теоретикон цæттæдзинад. Механизаторæй дæр домынц бæрзонд фæлтæрддзинад. Ацы тракторыл кусынмæ æрбахуыдтой Георгиевскæй специалисты Владислав Гавринскийы. Механикы дæсныйад равзæрста, скъолайы ма куы ахуыр кодта, уæд. Ирыстонмæ та ссыд, фæллой кæныны уавæртæ йæм хорз кæй фæкастысты, уымæ гæсгæ.
Зæгъдзыстæм ма уый дæр, æмæ Дыгуры районы хъæууон хæдзарады къабаз фæллойгæнджытæй цух не ййафы, зæгъынц хæдзарæдты. Уыимæ ма уалдзыгон-быдырон куыстытыл бафтауынц фæсивæды дæр. Уыдонæн фæлтæрдджын специалисттæ зæрдиагæй бацамонынц сæ зонындзинæдтæ.
