Саив æй кодтой æнæмæлгæ классикæйы уацмыстæ
Мариинаг театры филиал йæ цыппæрæм сезон сæхгæдта цымыдисаг концертæй. Саив æй кодтой æнæмæлгæ классикæйы уацмыстæ. Симфонитæй дарддæр аивадуарзджытæ сезон бахъуыды кæндзысты театралон постановкæтæй æмæ Куадзæны юбилейон фестивалæй. Артисттæ театрдзаутæн фæндараст куыд загътой, æмæ сæхи ног сезонмæ куыд цæттæ кæнынц, уый тыххæй бæстон радзурдзæн Фидараты Маринæ.
Цыппæрæм сезон Мариинаг театры филиал сæхгæны симфонион оркестры концертæй. Сценæмæ рацæуынц хъуыстгонд артисттæ. Дирижер Гугкаты Зауырбег æмæ арфисткæ Софья Кипрская адæмы размæ рахæссынц бæрзонд аивад. Концерты размæ генералон репетици. Мариинаг театры солисткæ Софья Кипрская филармонийы сценæмæ рацыди фыццаг хатт. Йæхæдæг куыд загъта, афтæмæй йын музыкæ ирыстойнаг аивадуарзджытæн лæвар кæнын у уæлдай æхсызгондæр.
Кæронбæттæн концерты репертуар у цымыдисаг, уыимæ ацыди, куыд фæзæгъынц, бæрзонд нотæйыл. Артисттæ ацагътой æнæмæлгæ классикæ – Рахманиновы дыккаг симфони, æмæ республикæйы црæджытæ тынг кæй бауарзтой, уыцы Дельтурæйы джазы концерт. Уæлдай тынгдæр та сæ зæрдæмæ фæцыди Хоакин Родригойы концерт. Уæззау хъысмæтимæ музыкант бакуырм ис, 3 азы йыл куы цыди, уæд. Фыста алыхуызон музыкæ. Дуне куыдæй уыдта, уый æвæрдта нотæтыл. Йæ уацмыстæ ирд æнкъарæнтæ гуырын кæнынц куыд музыканттæм, афтæ аивадуарзджытæм дæр.
Мариинаг театры филиалы симфонион оркестр ма алывæрсыгæй равдыста испайнаг мотивтæ. Публикæ уыцы-иу хуызонæй цин дæр кодта, æмæ суанг йæ цæссыгтæ дæр æркалдта. Фæлæ æнæмæнг у иу хъуыддаг – ацы изæрæй райста удæнцойдзинад æмæ уæлмонц æнкъарæнтæ.
Музыкæйы сæйраг нысан – ирд æнкъарæнтæ гуырын кæнын. Зæрдæйыл чи андзæвы, ахæм лирикæ ивы каджын маршæй. Цинæфтауæг скрипкæ, виолончель, контрабас , арфæ. Æппæт ацы инструменттæн дæсны разамынд дæтты Мариинаг театры филиалы сæйраг дирижер Гугкаты Зауырбег.
Зæгъын хъæуы уый, æмæ ацы сезон музыканттæн дæр æмæ аивадуарзджытæн дæр хуымæтæг нæ уыди. Ивгъуыд азы хуызæн эпидемиологон уавæры тыххæй æппæт концерттæ арæзт цыдысты, санитарон домæнтæ хынцгæйæ.
Ног сезонмæ цæттæгæнæн мадзæлттæ нæма райдыдтой. Музыкантты хъæуы сæ фæллад суадзын, цæмæй ног тыхтæй райдайой адæмы бæрзонд аивадимæ зонгæ кæнын. Фæлæ ныртæккæ дæр фидарæй зæгъынц – ног сезоны æнæнхъæлæджы æхсызгон лæвæрттæ æнæмæнг ракæндзысты.
