Экспозицимæ бахастой 60 пленэрон куыстæй фылдæр
Дзæуджыхъæуы историйы музейы байгом нывгæнæг, скульптор, зæрингуырд Дарчиты Аленæйы куыстыты равдыст «Притяжение красоты». Экспозицимæ бахастой 60 пленэрон куыстæй фылдæр. Мастеры этюдты ирдæй æвдыст цæуынц райгуырæн бæстæйы æрдз, стæй Сау денджызы был горæты уарзондæр уынгтæ. Зæгъын хъæуы уый дæр, æмæ æппæт куыстытæ конд æрцыдысты алы азты. Уæлдай ахсджиагдæр та сты фæстаг азты фыст этюдтæ. Мастер тынг уарзы æрдзы хъæбысы кусын. Рæстæгæй-рæстæгмæ ныууадзы йе рмадз, æмæ абалц кæны рæсугъд кæмттæм. Уым æфтауы йæ фæлтæрддзинадыл. Педагогон наукæты кандидат, Хетæгкаты Къостайы номыл Цæгат Ирыстоны паддзахадон университеты аивæдты факультеты нывкæнынады кафедрæйы доцент Дарчиты Аленæ у уæрæсейаг æмæ æппæтадæмон аивадон равдыстыты активон архайæг. Хорзæхджынгонд æрцыд Уæрæсейы нывгæнджыты Сфæлдыстадон Цæдисы æвзист æмæ сызгъæрин майдантæй.
