Нæ мастерты национ костюмтæ бирæ хæттыты хуыздæртыл нымад æрцыдысты кадджын уæрæсейаг æмæ æппæтадæмон равдыстыты
Ирыстойнаг модельертæ райдыдтой мюзикл «Фатимæ»-йæн костюмтæ хуыйын. Нæ мастерты национ костюмтæ бирæ хæттыты хуыздæртыл нымад æрцыдысты кадджын уæрæсейаг æмæ æппæтадæмон равдыстыты. Алы куыст дæр конд у рагон технологимæ гæсгæ, уыимæ бирæтæ сызгъæрин нывæфтыдты техникæйы æмæ фуртинурæйы. Аивадиртасджытæ куыд зæгъынц, афтæмæй спектакль Дзæуджыхъæуы театралон царды хъуамæ суа ирддæр цаутæй иу. Къостайы поэмæ республикæйы æвæрд æрцыди бирæ хæттыты. Фæлæ ахæм бакасты хуызы театрдзауты раз æрлæудзæн фыццаг хатт. Сæйраг хъайтарты аритæ æмæ зарæггæнджыты иумæйаг композицитæ иууылдæр сты ирон æвзагыл. Постановкæйыл кусынц республикæйы зындгонд культурæйы архайджытæ. Иу сценæйы – профессионалон актертæ, уæлдæр ахуыргæнæндæтты студенттæ æмæ зарæггæнджыты къордтæ. Премьерæ адæмы размæ рахæсдзысты фæззæджы. Дарддæр та труппæ фæнд кæны Уæрæсейы горæттыл гастрольтæ.
