Мæздæджы район, традицимæ гæсгæ, æфснайæн кампанийы хатдзæгтæм гæсгæ республикæйы у раззагдæртæй иу
Мæздæджы районы йæ тæмæны бацыд тыллæг æфснайæн куыст. Аграритæ быдырты фæллой кæнынц сæумæрайсомæй изæрмæ. Зайын кæнынц алыхуызон культурæтæ: цæхæрагæрдæгæй – фæззыгæндты æмæ уалдзыгæндты онг. Мæздæджы район, традицимæ гæсгæ, æфснайæн кампанийы хатдзæгтæм гæсгæ республикæйы у раззагдæртæй иу. Бæлвырддæр радзурдзæн Хъайтмазты Дзерассæ.
Хуры фыццаг тынтимæ быдырты сæ куыстмæ бавналынц фермертæ. Сæ хыгъды – Шавкат Алиев дæр. Мæздæджы районы цæхæрагæрдæг æрмæст уый зайын кæны. Басгæрдæг, хъонтхора æмæ хъæдындзæн æнæхъæн гектартæ дихгонд æрцыд. Æмæ кæд тæвдтыл адæм сахуыр сты, уæд билцъытæн стыр зиан хæссынц. Фермер куыд зæгъы, афтæмæй тыллæгæн ныридæгæн йе *ртын проценты фесæфт. Ахæм уавæрты цæхæрагæрдæг нырма мæры амæлы. Уый аграриты куыст зындæр кæны. Зæхх хъæуы ногæй бацæттæ кæнын æмæ байтауын мыггæгтæ.
Цæхæрагæрдæг байтауынц мартъийы. 40 боны фæстæ æххæстæй сцæттæ вæйы. Ам алы чысыл билцъмæ дæр сæрмагонд цæстдард ис. Басгæрдæг у витаминты æмæ минералты æвæрæн.
Тыллæг цас сисынц, уыцы бæрæггæнæнтæм гæсгæ Мæздæг у раззагдæртæй иу. Афтæ фарон хъæууонхæдзарадон культурæты иу гектарæй истой 29 центнеры, ацы аз та – 33. Ныртæккæ базарады къабазы фылдæр агурынц рапс æмæ нут. Се мрæнхъ – мæнæу æмæ хъæбæрхор.
Хуымты 67 мин гектарæй 45 ахсынц фæззыгæндтæ, 25 мины – уалдзыгæндтæ. Иннæ фæзуаттæ дихгонд сты бирæазон кæрдæджытæн. Мæздæджы районы фæззыгæндтæ бафснæйдтой, фæлæ куыст дарддæр цæуы. Быдыр хъæуы бахуым кæнын æмæ мæр бацæттæ кæнын.
